ताजा अपडेट
प्रधानाध्यापकको हत्यापछि गाउँ त्रसित
मोरङको मिक्लाजुङ गाउँपालिका–१ बर्खेस्थित सरस्वती आधारभूत विद्यालयका प्रधानाध्यापक राजेन्द्रकुमार श्रेष्ठको हत्या गरिएपछि स्थानीय बासिन्दा त्रसित बनेका छन् । प्रधानाध्यापक श्रेष्ठको नेत्रविक्रम चन्द ‘विप्लव’ नेतृत्वको नेकपाका कार्यकर्ताले अपहरणपछि घाँटी रेटेर हत्या गरेका थिए । सुराकीको आरोपमा हत्या गरिएको नेकपाले जनाएको छ ।
तर, स्थानीय बासिन्दा भने माग गरेअनुसार चन्दा नदिएका कारण हत्या गरिएको बताउँछन् । स्थानीय बासिन्दाका अनुसार असारमा विप्लवका कार्यकर्ताले १० हजार चन्दा माग गरेका थिए । श्रेष्ठले पाँच हजार दिन सक्ने भनेपछि चन्दा नलिई फर्किएका थिए । केही दिनअघि पनि खसी मागेका थिए । उनले दिएका थिएनन् । त्यसैले उनको हत्या गरिएको स्थानीय बासिन्दाको भनाइ छ ।
प्रधानाध्यापक श्रेष्ठको हत्यापछि गाउँ नै शोकमा डुबेको छ । यस घटनाबारे कोही पनि खुलेर बोल्दैनन् । सबै त्रसित अवस्थामा छन् । उनका श्रीमती र दुई छोराछोरी पनि त्रसित छन् । अपहरणपछि हत्या घटनाप्रति प्रदेश १ सरकारले चासो दिएको छ ।
बुधबार प्रदेश १ सरकारका प्रवक्ता आन्तरिक मामिला तथा कानुनमन्त्री हिक्मतकुमार कार्कीले विज्ञप्ति जारी गरी शिक्षकको हत्या घटनाले प्रदेश सरकार स्तब्ध भएको बताएका छन् । उनले हत्यामा संलग्नहरूलाई जसरी पनि पक्राउ गरेर कानुनी कारबाही गरेरै छाड्ने प्रतिबद्धता जनाएका छन् । उनले मृतकको परिवार र गाउँवासीलाई संयमता अपनाउन र अनुसन्धानमा सहयोग गर्न आग्रह पनि गरेका छन् ।
प्रदेश १ सभामा मुख्य प्रतिपक्षी दल कांग्रेसले पनि शिक्षक हत्या घटनाको विरोध गरेको छ । प्रमुख सचेतक केदार कार्कीले घटनालाई आततायी भन्दै दोषीलाई पक्राउ गर्न र स्थानीयवासीको सुरक्षाको ग्यारेन्टी गर्न माग गरेका छन् । उनले मोरङको उत्तरी क्षेत्रमा सुरक्षा बेसक्याम्प तुरुन्त राख्न पनि सरकारसँग आग्रह गरेका छन् ।
प्रतिक्रिया