Hamro Bulletin

मालपोत कार्यालय, भरतपुर चितवनमा करोडौँ राजस्व हिनामिना आरोपमा अख्तियार दुरुपयोग अनुसन्धान आयोगले तीन कर्मचारीविरुद्ध सोमबार विशेष अदालतमा मुद्दा दायर गरेको छ । 

आर्थिक वर्ष ०७३/७४ तथा ०७४/७५ को करिब साढे सात करोड राजस्व हिनामिना भएको हो । 

लेखा अधिकृत रिठ्ठे दर्जी, लेखापाल बलराम सापकोटा तथा नासु मनोज निरौलाविरुद्ध आयोगले मुद्दा दायर गरेको हो । 
तीनजनाविरुद्ध छुट्टाछुट्टै बिगो र सजाय माग गरी मुद्दा दायर गरिएको छ । 

सबैभन्दा धेरै लेखा अधिकृत दर्जीले हिनामिना गरेको आयोगले जनाएको छ । 

उनले सात करोड आठ लाख १७ हजार ३७ रुपैयाँ हिनामिना गरेका थिए । कार्यालयले उठाएको राजस्व बैंकमा दाखिला गरेको देखाउन उनले बैंकको सरकारी छाप तथा कर्मचारीको दस्तखतसमेत किर्ते गरेका थिए । 

आन्तरिक लेखापरीक्षका क्रममा पैसा बैंकमा नदेखिएपछि उनले दुई करोड ५८ लाख तीन हजार दुई सय ३१ रुपैयाँ दाखिला गरेका थिए । 

बाँकी चार करोड ५० लाख १३ हजार आठ सय ६ रुपैयाँ असुल हुनुपर्ने मागसहित उनीविरुद्ध मुद्दा दायर भएको छ ।   

लेखापाल बलराम सापकोटाले बैंक दाखिला प्रयोजनार्थ विभिन्न मितिमा मालपोत कार्यालय भरतपुर चितवनको विभिन्न फाँटमा संकलित राजस्व रकम आफूले बुझेको ५८ लाख ४३ हजार आठ सय ६ रुपैयाँ हिनामिना गरेको आयोगले जनाएको छ ।  
भ्रष्टाचार निवारण ऐन, २०५९ को दफा ७ को देहाय (ग) बमोजिम कसुर गरेको पुष्टि हुन आएकोले उनीउपर जेल सजाय र सो राजस्व असुलरउपरको मागसहित मुद्दा दायर भएको छ ।  

नायब सुब्बा पदमा कार्यरत मनोजकुमार निरौलाले मुद्दा फाँटमा संकलित राजस्व  चार लाख ७१ हजार ६ सय १८ रुपैयाँ मिनामिना गरेका थिए ।