ताजा अपडेट
संसद विघटन : वैशाखमा आम निर्वाचन गर्ने प्रधानमन्त्रीको प्रस्ताव
प्रधानमन्त्री केपी शर्मा ओलीले संसद विघटनकाे सिफारिस गरेसँगै २०७८ काे वैशाखमा आम निर्वाचन गर्ने प्रस्ताव अघि सार्नु भएकाे छ ।
मन्त्रिपरिषदकाे निर्णयपछि संसद विघटनको सिफारिस लिएर शीतल निवास पुग्नुभएका प्रधानमन्त्रीले वैशाख २३ मा निर्वाचन गराउने प्रस्ताव गर्नुभएकाे बताइएकाे छ । तर यसकाे अनुमाेदन भने राष्ट्रपति कार्यालयबाट भइसकेकाे छैन । स्राेतका अनुसार राष्ट्रपति विद्यादेवी भण्डारीले संसद विघटनकाे सिफारिस र चुनाव घोषणाको सिफारिसमाथि कुनै अनुमोदन गर्नुभएकाे छैन ।
सरकारको प्रस्ताव राष्ट्रपतिले रोक्न मिल्दैन : राष्ट्रपतिका प्रमुख राजनीतिक सल्लाहकार यादव
राष्ट्रपति विद्यादेवी भण्डारीका प्रमुख राजनीतिक सल्लाहकार डा. लालबाबु यादवले सरकारको प्रस्ताव रोक्न नमिल्ने प्रष्ट पार्नु भएको छ ।
प्रधानमन्त्री केपी शर्मा ओली राष्ट्रपति भण्डारीसमक्ष संसद विघटनको सिफारिस पेश गर्नु भएपछि न्यूज २४ संग संक्षिप्त प्रतिक्रिया दिँदै सल्लाहकार यादवले सरकारको प्रस्ताव रोक्न नमिल्ने बताउनु भएको छ ।
मन्त्रिपरिषद्को आकस्मिक बैठकले ताजा जनादेशका लागि संसद विघटनको सिफारिस गर्ने निर्णय गरेपछि राष्ट्रपति भण्डारीलाई भेट्न प्रधानमन्त्री ओली शीतल निवास पुग्नु भएको थियो ।
राष्ट्रपति भण्डारीसँग मन्त्रिपरिषद्को निर्णयसहित संसद विघटनको सिफारिस पेश गरेर प्रधानमन्त्री ओली बालुवाटार फर्किसक्नु भएको छ ।
राष्ट्रपतिका प्रमुख सल्लाहकार डाक्टर यादवले राष्ट्रपति भण्डारी आवश्यक परामर्शमा जुट्नु भएको र यसबारे चाँडै निर्णय आउने जानकारी पनि दिनुभयो । उहाँले सरकारको प्रस्ताव राष्ट्रपतिले रोक्न नसक्ने दोहोर्याउँदै आवश्यक परामर्श भने जारी राख्नु भएको बताउनुभयो ।
प्रतिक्रिया