Hamro Bulletin

सुदूरपश्चिमका मुख्यमन्त्री त्रिलोचन भट्टले भौतिक पूर्वाधार विकासमन्त्री पठानसिंह बोहरालाई पदमुक्त गरेका छन् । प्रधानमन्त्री केपी ओलीनिकट मन्त्री बोहरालाई मुख्यमन्त्रीले मंगलबार बिहान पदमुक्त गरेका हुन् ।

उक्त मन्त्रालयको जिम्मेवारी मुख्यमन्त्री भट्टले आफैँसँग राखेको मुख्यमन्त्रीका स्वकीय सचिव शिवसिंह ओलीले जानकारी दिए । नेकपा विभाजनपछि प्रचण्ड–नेपाल समूहका नेताहरूले प्रधानमन्त्री ओलीनिकट मन्त्री बोहरालाई हटाउन मुख्यमन्त्रीलाई दबाब दिँदै आएका थिए ।

प्रचण्ड–नेपाल समूहका प्रदेश इन्चार्ज भीम रावलसँगको परामर्शपछि मुख्यमन्त्री भट्टले मन्त्री बोहरालाई पदमुक्त गरेका हुन् । सात सदस्यीय प्रदेश मन्त्रिपरिषद्मा ओली समूहबाट मन्त्री बनेका बोहरा एकजना मात्र हुन् । मन्त्री बोहराको ठाउँमा कसलाई नियुक्त गर्ने भन्नेबारे छलफल भइरहेको प्रचण्ड–नेपाल समूहका एक नेताले बताए । बोहरालाई पदमुक्त गरिएसँगै प्रचण्ड–नेपाल समूहका आकांक्षीले लबिङ थालेका छन् ।

प्रदेशका आर्थिक मामिला तथा योजनामन्त्री झपटबहादुर बोहरालाई ओली समूहले पार्टीको केन्द्रीय सदस्यमा मनोनीत गरेको छ । ओली समूहले केन्द्रीय सदस्यमा मनोनीत गरे पनि मन्त्री बोहरा भने अहिलेसम्म मौन छन् । औपचारिक रूपमा नखुले पनि उनी ओली समूहमै लाग्ने स्रोतको दाबी छ । उनले भने आफू अहिलेसम्म पार्टी एकताकै पक्षमा रहेकाले कुनै समूहमा नलागेको बताएका छन् । उनी संघीय उद्योग, वाणिज्य तथा आपूर्तिमन्त्री लेखराज भट्टनिकट मानिन्छन् । मन्त्री भट्ट प्रधानमन्त्री ओली पक्षमा खुलेका छन् ।

सुदूरपश्चिम प्रदेश सभामा ओली पक्ष कमजोर छ । ५३ सदस्यीय प्रदेश सभामा सभामुखसहित नेकपाका ३९ जना छन् । सुरुमा ओली समूहमा तीनजना मात्र थिए । तर, अहिले सातजना ओली पक्षमा खुलेका छन् । नेकपाका प्रदेश सभा सदस्यहरूले समूह फेरबदल गर्न थालेपछि ओली पक्ष बलियो सम्भावनाका कारण प्रचण्ड–नेपाल समूह बहुमत जोगाउने कसरतमा छ । असन्तुष्टलाई जिम्मेवारी दिएर मनाउनका लागि मन्त्रिपरिषद् र संसदीय समिति हेरफेर र विस्तार गर्ने प्रचण्ड–नेपाल समूहको तयारी छ ।

प्रचण्ड–नेपाल समूहको बहुमत जोगाउने र ओली समूहको सरकार अल्पमतमा पार्ने कसरतले सांसदहरू तानातानमा परेका छन् । केही सांसदले भने अझै कित्ता स्पष्ट गरेका छैनन् । सुदूरपश्चिमका प्रभावशाली नेता लेखराज भट्ट ओली समूहमा रहेकाले उनीनिकट केही प्रदेश सभा सदस्य ओली समूहमा जाने तयारीमा रहेको स्रोतको दाबी छ । ओली समूहबाट केन्द्रीय सदस्य बनेका प्रदेश सभा सदस्य रतन थापाले प्रदेशमा प्रचण्ड–नेपाल समूहको बहुमत तोडिने दाबी गरे । ‘प्रदेश सरकार अल्पमतमा पर्ने गरी हाम्रो संख्या पुग्ने निश्चित भएको छ । केही दिनमै धेरै साथी खुलेर हामीतिर लाग्नुहुन्छ,’ थापाले भने, ‘सरकारको बहुमत तोडिन्छ । सरकार गठन भने कांग्रेससँग केन्द्रमा हुने समीकरणमा भर पर्छ ।’

प्रचण्ड–नेपाल पक्षका नेताहरू भने आफ्नो स्पष्ट बहुमत रहेकाले सरकार फेरबदल हुने कुरा हल्ला मात्र भएको बताउँछन् । नेकपा संसदीय दलका उपनेता एवं आन्तरिक मामिला तथा कानुनमन्त्री प्रकाशबहादुर शाहले प्रदेश सभामा आफ्नो पक्षको सुविधाजनक बहुमत रहेकाले सरकार फेरबदल नहुने बताए । ‘कसैले सरकार फेर्छु भन्दैमा सम्भव छैन,’ उनले भने, ‘हामीसँग सुविधाजनक बहुमत छ भन्ने प्रस्टै छ ।’ सरकार भने विस्तार हुन सक्ने उनले बताए । दुई दिनदेखि धनगढीमा रहेका प्रचण्ड–नेपाल समूहका नेता भीम रावलले प्रदेशमा बहुमत कायम राख्न असन्तुष्टलाई मनाउने प्रयास गरिरहेका छन् ।

बहुमत भए पनि प्रचण्ड–नेपाल पक्षभित्रै सरकारको नेतृत्व फेर्नुपर्ने आवाज भने चर्को छ । पूर्वमाओवादीबाट मुख्यमन्त्री बनेका त्रिलोचन भट्टको कार्यशैलीप्रति पूर्वमाओवादीकै प्रदेश सभा सदस्य असन्तुष्ट छन् । पूर्वएमाले समूहका केही प्रदेश सभा सदस्य पनि नेतृत्व फेर्नुपर्ने लबिङमा छन् । प्रदेश सभामा कांग्रेसका १२ र जनता समाजवादी पार्टीका दुई सदस्य छन् ।