Hamro Bulletin

माघ १४ ,अछाम

विभिन्न ऐन तथा कार्यविधि पारित गर्दै मंगलसेन नगरपालिकाको छैटौं नगर सभा तथा हिउँदे अधिवेशन मंगलसेनमा सम्पन्न भएको छ । नगरले ६ महिनाको अवधिमा नगरले गरेको प्रगती विवरण सार्वजनिक प्रमुख प्रशासकीय अधिकृत खकेन्द्र बहादुर सोडारीले प्रस्तुत गर्नु भएको थियो । मंगलसेन नगरपालिका प्रमुख पदम बहादुर बोहराको अध्यक्षतामा भएको कार्यक्रमको शुभारम्भमा नगरपालिका मार्फत ६ महिनाको अवधिमा भएका काम सार्वजनिकपछि नगरसभाका सदस्य तथा जिल्ला स्थित पत्रकारले सुझाव सहित जिज्ञासा राख्नु भएको थियो ।

कार्यक्रमका सहभागी पत्रकारले जनप्रतिनिधिले भौतिक विकासलाई मात्र प्राथमिकता दिएकाले समाजिक अभियानमा जोड् दिन सुझाव दिएका थिए । आफ्नो जग्गा आफ्नो बारी, बाँझो नराखी बनाऔँ हरियाली, नाराका साथ भएको कार्यक्रममा कृषि, पशुपालन, स्वास्थ्य, महिला, शिक्षा, बालबालिकाका क्षेत्रका कार्यक्रममा बिशेष ध्यान दिन आग्रह गरिएका थिए । सहभागीको प्रश्नको जवाफ दिँदै मंगलसेन नगरपालिका प्रमुख पदम बहादुर बोहराले हरेक क्षेत्रलाई सम्बोधन गर्दै अघि बढेको बताउनुभयो । नगरपालिकालाई मात्रै दोष थुपार्नु भन्दा पनि वडा तहमा विकासका लागि थुप्रै बजेट आएकाले सबैले कार्यान्वयन गर्दै लैजानु पर्ने बताउनु भयो । नगरको दुर्गम वडा बस्तीमा विकास नहुनुको दोष स्वयम त्यहीका जनता भएकाले आगामी दिनमा गाउँको विकासका लागि सबै एकजुट भएर जानु पर्ने बताउनु भयो । हिउँदे अधिबेशनमा यस आर्थिक बर्षमा कार्यान्वयन हुने गरि नगरका सबै वडामा १ सय ४६ योजना मध्ये २३ योजनाको मात्रै अहिलेसम्म सम्झौता हुन सकेको प्रमुख प्रशासकिय अधिकृत खकेन्द्र बहादुर सोडारीले जानकारी दिनु भयो ।

नगरका विभिन्न वडामा आवश्यक सहीत गौरवका योजनालाई कार्यान्वयनका लागि पुर्बाधार, सडक बोर्ड, प्रदेश, स्थानीय पुर्वाधार लगाएत क्षेत्रमा सिफारिस गरेर पठाईएको सोडारीले जानकारी दिनुभयो । मंगलसेन नगरपालिका आर्थिक बर्ष २०७७/०७८ मा चालु र पुँजिगत तर्फ गरि विनियोजित ५९ करोड बढी रकम मध्ये ६ महिनाको अवधिमा झण्डै २८ प्रतिशत खर्च भएको र आर्थिक बर्ष २०७५/०७६ सम्म ५ करोड बढी बेरुजु रहेको उहाँले बताउनु भयो । नगरसभाको बन्दसत्रले आगामी आव २०७८/७९ को लागि नगर उपप्रमुख सरिता उपाध्यायले बजेट प्रक्षेपण प्रस्ताव पेश गर्नुभएको थियो । उहाँका अनुसार नगरसभाले आगामी आव २०७८/७९ को लागि ६५ करोड ६८ लाख ८१ हजार बजेट प्रक्षेपण प्रस्ताव पारित गरेको छ । त्यस्तै चालु आव ०७७/७८ को योजना तथा कार्यक्रम संसोधन प्रस्ताव पारित गरेको हो ।

बुधबार मंगलसेनमा सम्पन्न भएको नगर सभाले नगर स्वास्थ्य तथा सरसफाइ ऐन २०७७ , व्यवसाय दर्ता तथा नविकरण ऐन २०७७ समेत पारित गरेको सोडारीले बताउनुभयो । कार्यपलिका बाट पारित ६ वटा कार्यविधिहरु नगरसभा बाट अनुमोदन गरेको उहाँले बताउनुभयो । आर्थिक ऐन २०७७/७८ लाई संशोधन समेत गरेको छ । यसअघिका नगर सभाबाट मंगलसेन नगरपालिकाले विभिन्न ३९ वटा कानुन पारित गरेको थियो । बुधबार सम्पन्न भएको नगर सभा बाट विभिन्न ८ वटा ऐन तथा कार्यविधि पारित गरी हालसम्म नगरले ४७ वटा कानुन निर्माण गरेको छ । मंगलसेन नगरपालिका उपप्रमुख सरिता उपाध्यायको स्वागत मन्तव्यबाट सुरु भएको कार्यक्रममा कार्यपालीका सदस्य, सबै वडाका वडा अध्यक्ष, वडा सदस्य, पत्रकारको सहभागीता रहेको थियो ।