Hamro Bulletin

माघ १५ अछाम

मंगलसेन नगरपालिकाले नगरभित्रका विद्यालयको अनुगमन सुरु गरेको छ । नगरपालिकाले विद्यालयका किशोरीलाई लक्षित गरि उपप्रमुख सरिता उपाध्यायको नेतृत्वमा सेनेरेटरी प्याड वितरणको अवस्था ,सरसफाइको अवस्थाको बारे अनुगमन गरिएको हो । महिनावारी हुने किशोरीलाई उपलब्ध हुनेगरी नगरले विद्यालयलाई दिएका सेनेरेटरी प्याडको सहि सदुपयोग गराउन उपप्रमुख उपाध्यायले विद्यालय र क्याम्पसका प्रमुखलाई आग्रह गर्नुभयो ।

सोही क्रममा अछाम बहुमुखी क्याम्पस ,शोडषा माविको अनुगमन गरिएको थियो । अनुगमनका क्रममा शोडषा माविका छात्राले सेनेरेटरी प्याड पाए पनि प्रयोग पछि व्यवस्थापन गर्न गार्‍हो भएको बताएका थिए । विद्यालयका शौचालयमा पानी नहुनु , व्यवस्थित नहुनुले महिनावारी भएको समयमा गाह्रो हुने गरेको छात्राहरुले बताएका थिए । साथै उपप्रमुख उपाध्यायको टोलीले छाउगोठ भत्काइसके पछिको सहजता/ असहजता के छ भन्ने प्रश्नमा छात्राहरूले गोठमा जान नपरेको र घरमै व्यवस्थित गरेर बस्ने गरेको बताए । नियमित विद्यालय आउन कुनै समस्या भएमा आफूलाई सिधै सम्पर्क गर्न समेत उपप्रमुख उपाध्यायले आग्रह गर्नुभएको थियो । नगरका सबै विद्यालयमा जाने र छात्राहरूसँग अन्तरक्रिया गरिने उपप्रमुख उपाध्यायले बताउनु भयो ।

अनुगमनमा शिक्षा शाखाका दिपेन्द्र बिष्ट , स्वास्थ शाखाका चन्द्रप्रसाद ढुंगाना , महिला बालबालिका तथा ज्येष्ठ नागरिक शाखाका जयलक्ष्मी जोशी तथा पत्रकार लगायतको सहभागिता रहेको थियो ।