ताजा अपडेट
गृहजिल्लामै पकड गुमाउँदै भीम रावल, प्रभावशाली नेता ओली समूहमा
नेपाल कम्युनिस्ट पार्टी (नेकपा) को प्रचण्ड–नेपाल समूहका प्रभावशाली नेता डा. भीम रावलको गृहजिल्ला अछाममा नै पकड कमजोर बन्दै गएको छ । संसद् विघटनपछि नेकपामा आएको विभाजनसँगै अछामका अधिकांश नेताहरुले साथ छोडेपछि उनको पकड कमजोर बन्दै गएको हो ।
अछाममा तत्कालीन नेकपा एमालेमा लामो समयदेखि काम गरेका अधिकांश नेताहरु प्रधानमन्त्री केपी शर्मा ओलीले नेतृत्व गरेको नेकपामा सामेल भएका छन् । नेता डा. रावलको व्यवहार र कार्यशैलीका कारण पाका नेताहरु ओली समूहमा लागेपछि उनी जिल्लामा कमजोर अवस्थामा पुगेको नेकपा स्रोतले दाबी गरेको छ ।
रावलले निर्वाचन लड्दै आएको अछाम निर्वाचन क्षेत्र नम्बर १ स्थायी घर भएका जिल्ला विकास समितिका पूर्वसभापति कृष्णप्रसाद जैशीले ओली समूहलाई साथ दिएका छन् । यस्तै सोही निर्वाचन क्षेत्रमा घर भएका तत्कालीन एमालेका पूर्व जिल्ला अध्यक्ष कमल तिमल्सिनाले पनि नेता रावलको साथ छोडेका छन् ।
सुदूरपश्चिम प्रदेश सरकारका निवर्तमान आर्थिक मामिला तथा योजनामन्त्री झपटबहादुर बोहरा पनि ओली समूहमा लागेका छन् । उनी रावलकै निर्वाचन क्षेत्र १ (ख) बाट तत्कालीन नेकपा माओवादी केन्द्रबाट प्रदेश सभा निर्वाचनबाट विजयी भएका थिए ।
संसद् विघटनपछि पार्टीमा देखिएको विभाजनपछि बोहराले प्रदेश सरकारको आर्थिक मामिला तथा योजनामन्त्रीबाट राजीनामा दिएर प्रधानमन्त्री ओलीलाई साथ दिएका छन् । रावलकै निर्वाचन क्षेत्रमा राजनीति गर्दै आएका पूर्व बिना विभागियमन्त्री भीम कडायत पनि प्रधानमन्त्री ओलीको पक्षमा उभिएका छन् ।
रावलकै निर्वाचन क्षेत्र नम्बर १ कै मतदाता रहेका तत्कालीन माओवादीको विद्यार्थी संगठन अखिल क्रान्तिकारीका केन्द्रीय सचिव डीबी साउदले पनि प्रधानमन्त्री ओलीको पक्षमा उभिएका छन् । उनलाई नेकपाको ओली समूहले अछामको जिल्ला सचिवको जिम्मेवारी दिएको छ ।
पूर्वसभासद् भैरे कामीले पनि प्रचण्ड–नेपाल समूहका नेता रावलको साथ छोडेका छन् । क्षेत्र नम्बर २ का मतदाता रहेका कामी २०६४ को संविधान सभामा तत्कालीन नेकपा एमालेबाट समानुपातिक सभासद् थिए ।
अछामको भैसोली क्षेत्रमा प्रभावशाली मानिने तत्कालीन नेकपा एमालेका नेता कटक साउदले पनि ओली समूहलाई साथ दिएका छन् । पञ्चदेवल विनायक र कमलबजार नगरपालिका, तुर्माखाँद र ढकारी गाउँपालिका पर्ने भैसोली क्षेत्रमा नेता साउदको बलियो पकड छ ।
विघटित प्रतिनिधि सभा सदस्य यज्ञबहादुर बोगटी र २०६४ मा तत्कालीन एमालेका तर्फबाट संविधान सभा सदस्य पदका उम्मेदवार शिवप्रसाद उपाध्यायले पनि नेता रावलको साथ छोडेका छन् ।
तत्कालीन एमालेका प्रभावशाली नेता चन्द्र बोहरा पनि ओली समूहमा लागेका छन् । उनलाई ओली समूहले अछामको अध्यक्ष बनाएको छ । विभाजनपूर्वको नेकपा अछामका जिल्ला सचिवालय सदस्य भीम जनाला, एमालेका पुराना कार्यकर्ता मना अधिकारी, तत्कालीन जिल्ला विकास समिति अछामका पूर्व क्षेत्रपाल देवबहादुर कुवँर र पृथ्वी भण्डारीले पनि प्रधानमन्त्री ओलीलाई साथ दिएका छन् ।
मंगलसेन नगरपालिकाका प्रमुख पदम बोहरा र उपमेयर सरिता उपाध्यायले पनि नेकपाको ओली समूह रोजेका छन् । यस्तै माओवादीले १० वर्षसम्म सञ्चालन गरेको सशस्त्र विद्रोहका हस्ती मानिने खगेन्द्र रोकाया पनि प्रधानमन्त्री ओलीको पक्षमा उभिएका छन् । माओवादी पार्टी निर्माण र विस्तारमा महत्वपूर्ण योगदान पुर्याए पनि उनी उपेक्षामा पर्दै आएका थिए ।
अछाम निर्वाचन क्षेत्र नम्बर १ का झण्डै ५० प्रतिशत र क्षेत्र नम्बर २ का झण्डै ७५ प्रतिशत नेता–कार्यकर्ताहरु प्रधानमन्त्री ओलीको पक्षमा उभिएका ओली पक्षीय नेकपाका जिल्ला सचिव साउदले दाबी गरे । पार्टीका अधिकांश नेता–कार्यकर्ताहरुको साथ पाएपछि अछाममा ओली समूह अत्यन्तै उत्साहित भएको उनको भनाइ छ ।
“अछाम निर्वाचन क्षेत्र नम्बर १ मा हामी ५० प्रतिशत छौं । क्षेत्र नम्बर २ मा भने हामीसँग ७५ प्रतिशत नेता–कार्यकर्ताहरु हुनुहुन्छ,” जिल्ला सचिव साउदले लेखाजोखासँग भने, “पार्टीका अधिकांश नेता–कार्यकर्ताहरु हामीसँग उभिनुभएपछि हाम्रो समूह उत्साहित छ ।”
नेकपाको भ्रातृसंस्था प्रेस संगठनको प्रभावशाली तप्का पनि ओली पक्षमा खुलेको छ । मिडिया क्षेत्रका प्रभाव राख्ने अधिकांश पत्रकारहरु प्रधानमन्त्री ओलीले नेतृत्व गरेको नेकपाको पक्षमा उभिएका छन् ।
तत्कालीन एमाले निकट प्रेस चौतारीबाट प्रेस संगठन, नेपालको जिल्ला सह–संयोजक भएका कृष्णबहादुर बुढा पनि ओली समूहमा लागेका छन् । उनलाई ओलीनिकट पत्रकारहरुले प्रेस संगठन, नेपालको जिल्ला संयोजक चयन गरेका छन् । अछामको ढकारी गाउँपालिकामा पकड भएका बुढालाई ओली समूहले नेकपाको जिल्ला कमिटी सदस्य पनि बनाएको छ ।
लेखाजोखा न्युज बाट साभार
प्रतिक्रिया