Hamro Bulletin

सरकारले सीमा नाका खुला गरेपनि सुदूरपश्चिम प्रदेशका सीमा नाकामा स्थानीय प्रशासनले अझै पनि रोक लगाएको छ। अत्यावश्यक काम बाहेक आवातजावत गर्नमा अझै पनि रोक लगाइएको हो।

निर्बाध आवातजावतमा रोक लगाइएपछि सार्वसाधारणले खुला गर्नुपर्ने माग गरेका छन्। माघ १५ गते बिहीबार सरकारले देशभरका ३० वटा सीमा नाका खोल्ने निर्णय गरेको छ। जुन निर्णय अनुसार सुदूरपश्चिमका त्रिनगर, गड्डाचौकी, जुलाघाट र दार्चुलाको पुलघाट नाकामा सहज हुने भनिएको छ।

तर सो सरकारी निर्णय सुनेर त्रिनगर नाका भएर भारतीय बजार जान हिडेकी सैलु जोशीले सरकारी निर्णय कार्यान्वयन नभएको भन्दै आक्रोश पोखिन्। उनले बिना रोकटोक जान पाउनुपर्ने माग राखिन्। सीमा नाकामा भारतीय पक्षले नेपालीहरुलाई आवातजावत गर्न कुनै रोकटोक नगरेपनि नेपाली सुरक्षा निकायले भने गरेको अवरोधप्रति धनगढीकी अर्की स्थानीय जानकी बिष्टले पनि असन्तुष्टि पोखिन्।

कि सबै नाका बन्द गरिनुपर्ने या निर्णय अनुसार खुला गरिनुपर्ने बिष्टको भनाइ थियो। स्थानीय प्रशासनले भने अत्यावश्यक कामका लागि भारत जान र आउनमा कुनै रोक नभएको तर घरायसी सामान खरिद गर्नका लागि भने भारत जानमा रोक यथावत रहेको बताएको छ।

कञ्चनपुरका सहायक प्रमुख जिल्ला अधिकारी अशोक भण्डारीले दैनिक उपभोग्य वस्तुको अभाव नेपालमा नरहेको अवस्थामा संक्रमणको जोखिम मोलेर भारतीय बजारमा नजाउन् भन्ने मनाशयले रोक लगाएको बताए। जसलाई सकारात्मक रुपमा लिनुपर्ने उनको भनाइ छ।

विश्वभर नयाँ प्रजातिको कोरोना फैलिइ रहेको अवस्थामा स्वास्थ्य सुरक्षाका मापदण्ड अप्नाएर मात्रै अत्यावश्यक कामका लागि मात्र भारत जान स्थानीय प्रशासनको अनुरोध छ।