Hamro Bulletin

सुदूरपश्चिम प्रदेशमा झण्डै साढे २३ हजार जनालाई कोरोना भाईरस विरुद्धको खोप लगाइएको छ।

सुदूरपश्चिम प्रदेश स्वास्थ्य निर्देशनालय डोटीकाअनुसार प्रदेशभर हालसम्म २३ हजार ४ सय १७ जनाले कोरोना भाईरस विरुद्धको खोप लगाएका हुन्। 

पहिलो चरणको पहिलो लक्षित समूह र पहिलो चरणकै दोस्रो लक्षित समूह समेत गरेर १९ हजार १ सय ९५ जना पुरुष र ४ हजार २ सय ७ जना महिलाले कोरोना विरुद्धको खोप लगाएको स्वास्थ्य निर्देशनालयले जनाएको छ। 

निर्देशनालयको तथ्यांकअनुसार कैलालीमा सबैभन्दा धेरै ६ हजार ७ सय १० जनाले खोप लगाएका छन्।

कञ्चनपुरमा ३ हजार ५ सय ३८, डोटी ३ हजार १६ जना, बैतडी १ हजार ८ सय ४५ जना, बझाङमा १ हजार ७ सय ७७ जनालाई खोप  लगाइएको छ। 

यस्तै, अछाममा १ हजार ७ सय ९३, दार्चुलामा १ हजार ७ सय ४६, डडेल्धुरामा १ हजार ६ सय र बाजुरामा १ हजार ३ सय ८९ जनाले खोप लगाएका छन्।

पहिलो चरणको अभियान अन्तरगत प्रदेशभर २६ हजार ७ सय ४४ जनालाई खोप लगाउने लक्ष्य राखिएकोमा हालसम्म ८७ दशमलव ५५ प्रतिशतले खोप पाएको स्वास्थ्य निर्देशनालयले जनाएको छ।