Hamro Bulletin

युवा युवती बिचको प्रेम सम्बन्धमा समस्या श्रृजना भएपछि ठुला घटना भएका खबर निकै सुनिएपनि बिबाहित महिला पुरुष बिचको प्रेम सम्बन्ध र प्रेम सम्बन्धकै कारण हत्या सम्मका घटना कमै सुनिन्छन् । बिबाहित महिला पुरुषको परस्त्री र परपुरुषसंगको अबैध प्रेम सम्बन्ध र प्रेम सम्बन्धबाटै हत्या सम्मको घटना कैलालीमा घटेको छ । घर परिवार सम्हाली सकेका महिला पुरुषले प्रेम त गरे आफु संगै अर्की युवतीसंग प्रेमीको सम्बन्ध थाहा पाएपछि आफ्नै प्रेमीकाले प्रेमीको हत्या गरेकी छिन् ।

फागुन १५ गते कैलालीको गोदावरी नगरपालिका–५ गेटीमा ३६ वर्षीय शिवचरण राना मृत भेटिएका थिए । रानाको हत्या गरेको अभियोग लागेकी एक युवतीलाई प्रहरीले सार्वजनिक गरेको छ । जिल्ला प्रहरी कार्यालय कैलालीले रानाको हत्यामा संलग्न भएको अभियोगमा पक्राउ परेकी ३७ वर्षीया जयन्ती चौधरीलाई बिहिबार पत्रकार सम्मलेनमार्फत सार्वजनिक गरेको हो । उनले आफ्ना नाता पर्ने एक युवक र उनका सहकर्मीलाई केही रकम दिएर रानाको हत्या गर्न लगाएको समेत स्वीकार गरेको जिल्ला प्रहरी कार्यालय कैलालीका प्रमुख अनुपम शमसेर जबराले जानकारी दिए ।

सोही ठाउँकी ती युवतीले साबिती बयानका क्रममा रानाले आफुलाई सताइरहने गरेका कारण हत्याको योजना बनाएको प्रहरी समक्ष स्वीकार गरेकी छिन् । हत्याकाण्डकी आरोपित अन्दाजी ३६ वर्षीया युवतीले आफूले रानाको हत्या योजना बनाएको भन्दै प्रहरी समक्ष साबिती बयान दिएकी हुन् । विगत केही महिनादेखि मृतक रानाले मानसिक तनाव दिइरहेको भन्दै उनले हत्याको योजना बुनेको भन्दै बयान दिएको एक प्रहरीले जनाएको छ ।

आरोपित युवती केही समयदेखि मृतक शिवचरण रानासँगको प्रेम सम्बधमा थिइन् । दुवै विवाहित भएकाले त्यो सम्बन्ध एउटै गाउँको समाजले स्वीकार गर्ने कुरै थिएन । दुवैजना सम्बन्धपछि नजिक बनेका थिए। यतिसम्मकी शिवचरणले पारिवारिक काममा समेत सहयोग गर्ने गरेको युवतीले बताइन् । दुवैको हिमचिम धेरै भएपछि एकदिन युवतीका श्रीमानले दुवैलाई रंगेहात आफ्नै घरमा फेला पारेका थिए । त्यही दिन युवतीका श्रीमानले उनलाई घरबाट निकालेका थिए। तर शिवचरणले २ लाख दिने र अबबाट नभेट्ने सहमतिपछि युवतीका श्रीमानले युवतीलाई पुनः स्वीकारेको जबराले जानकारी दिएका छन् ।