ताजा अपडेट
कर्णाली नदीमा बेपत्ता भएका थप दुईजनाको शव भेटियो, एकजना अझै बेपत्ता
कर्णाली नदीमा बेपत्ता भएका एकै परिवारका पाँचजनामध्ये ४ जनाको शव भेटिएको छ । प्रहरीका अनुसार एकजनाको शव अझै भेटिएको छैन ।
तीन छोरी र एक छोरासहित कर्णालीमा बेपत्ता भएकी दैलेख आठबीस नगरपालिका–३ निमायलकी ३५ वर्षीया सुकी बडुवाल र उनका छोरा १० वर्षीया ललितको शव भेटिएको जिल्ला प्रहरी कार्यालय दैलेखले जनाएको छ ।
आमाछोराको शव अछामको पञ्चदेवल विनायक नगरपालिका–४ स्थित कर्णाली नदीमा आज मध्यान्ह १२ बजेतिर फेला परेको हो ।
१६ वर्षीया छोरी कल्पना र १२ वर्षीया छोरी सरिताको शव सोमबार नै फेला परेको थियो ।
५ वर्षीया छोरी रजनी अवस्था भने अझै अज्ञात छ । उनको खोजी कार्य जारी रहेको प्रहरीले जनाएको छ । घटनास्थलमा दैलेख र अछामको प्रहरी र गोताखोरको टोली खटिएको छ ।
स्थानीयका अनुसार सोमबार दिउँसो ४ बजेको समयमा सुकी छोराछोरीसहित निस्किएकी थिइन् । तर साँझ अबेरसम्म घर नआएपछि खोजी गर्दा सोमबार नै दुई छोरीको कर्णालीमा शव फेला परेको थियो ।
मृतक सुकीका श्रीमान् मानसिंह बडुवाललाई प्रहरीले नियन्त्रणमा लिएको छ । दिनहुँ मदिरा सेवन गरेर श्रीमतीसँग झगडा गर्ने गरेको आरोप अनुसार प्रहरीले उनलाई नियन्त्रणमा लिएर अनुसन्धान गरेको बताइएको छ ।
प्रतिक्रिया