ताजा अपडेट
अछामको तुर्माखाँदमा भेटियो कर्णालीमा बेपत्ता रजनीको शव
दैलेख – कर्णाली नदीमा हाम फालेर आत्महत्या गरेको घटनामा बेपत्ता पाँच वर्षीया बालिका रजनी बडुवालको शव भेटिएको छ । उनको शव नवौँ दिन मङ्गलवार अछामको तुर्माखाँद गाउँपालिका ३ असाराघाट नजिक कर्णाली नदी किनारमा भेटिएको जिल्ला प्रहरी कार्यालय दैलेखका प्रहरी नायब उपरीक्षक ९डीएसपी० अनुपम श्रेष्ठले जानकारी दिनुभयो । कर्णाली नदीको किनारमा भेटिएको बालिकाको शव पोस्टमार्टमका लागि अछामको मङ्गलसेन अस्पताल पठाइएको छ ।
दैलेखको आठबीस ३ निमायलकी ३५ वर्षीया सुकी बडुवाल चार सन्तानसँगै फागुन २४ गते कर्णाली नदीमा हाम फालेर सामूहिक आत्महत्या गरेको प्रहरी अनुसन्धानबाट खुलेको छ ।
सुकीका छोरीहरू १४ वर्षीया कल्पना र १२ वर्षीया सरिताको शव घटनाको दिन र आमा सुकी तथा उहाँका छोरा १० वर्षीया ललितको शव घटनाको भोलिपल्ट फागुन २५ गते कर्णाली नदीमै भेटिएको थियो ।
कल्पना र सरिताको हात एउटै डोरीले बाँधिएको र सुकीको पटुकी र छोरा ललितको टिसर्ट गाँठो परेको अवस्थामा शव भेटिएको थियो । सुकीका छोरी १४ वर्षीया कल्पना स्थानीय नेरा माविमा कक्षा ७ मा पढ्थिन् । यस्तै १२ वर्षीया सरिता पाँच कक्षा, १० वर्षका ललित तीन कक्षा र पाँच वर्षीया रजनी कक्षा एकमा पढ्थिन् ।
सुकीका श्रीमान् मानसिंह बडुवालले मदिरा सेवन गरी दुःख दिएका कारण सुकी चार सन्तानसहित नदीमा हाम फाल्न बाध्य पारेको कसुरमा उनीमाथि जिल्ला प्रहरी कार्यालय अछामले आत्महत्या दुरुत्साहन मुद्दा चलाइ हिरासत राखेको छ ।
मृतक पाँचै जनाले आफ्नो गाउँ दैलेखको आठबीस नगरपालिका ३ निमायल नजिकै कर्णाली नदीमा हाम फाले पनि सबैको शव अछाम जिल्लाको भू–भागमा फेला परेका कारण अछाममा मुद्दा चलाइएको कर्णाली प्रदेशका प्रहरी इञ्चार्ज वसन्तकुमार पन्तले जानकारी दिनुभयो ।
प्रतिक्रिया