ताजा अपडेट
ठक्कर दिने सेटिङमा छुटे, बिरामी अलपत्र र भोकभोकै
झापा ,चैत्र ३
उपचारबापतको शुल्क तिर्न नसक्दा विराटनगर अस्पतालमा सुनसरीका एक युवक अलपत्र परेका छन् । उपचारबापतको रकम भुक्तानी गर्न नसक्दा इनरुवा नगरपालिका–७ चाँदबेलाका १९ वर्षीय रविन सरदार एक महिनादेखि विराटनगर अस्पताल (विराट नर्सिङहोम) मा अलपत्र बनेका हुन् । अस्पतालमा बस्दा उनलाई विहान–बेलुका खानकै समस्या छ ।
सुनसरीको इटहरी उपमहानगरपालिका–१६ बालग्राममा रहेको सनसाइन एकेडेमी बोर्डिङ स्कुलले उनको उपचार गराएबापतको पैसा तिर्न आनाकानी गरिरहेको छ । स्कुलको ना८ख ८४१८ नम्बरको बस र रविनले चलाएको को२४प ७३२६ नम्बरको मोटरसाइकल ठोक्किएर गत माघ २१ गते दुर्घटना भएको थियो ।
दुर्घटना गराउने सवारी र चालक भने उपचार खर्च नतिरी छुटिसकेका छन् । इटहरी– ८ फूलबारी टोलमा भएको दुर्घटनामा परेर गम्भीर घाइते भएका उनको टाउकोमा गहिरो चोट लागेको थियो । अस्पतालका न्युरो सर्जन डा. विवेक वैद्य नेतृत्वको चिकित्सक टोलीले टाउकाको शल्यक्रिया गरेको थियो । पैसा नहुँदा मुखको भने शल्यक्रिया हुन सकिरहेको छ्रैन ।
उपचार ठीक भएको भन्दै अस्पतालले गत फागुन ४ गते नै डिस्चार्ज दिइसके पनि स्कुलले उपचार खर्च नतिर्दा उनी अस्पतालमै छन् । अस्पतालले पनि उपचार खर्च भुक्तानी नभएसम्म घर जान नदिने बताएको आमा उकावतीले सरदारले बताइन् । रविनको देब्रे आँखा अझैसम्म खुल्दैन । दाहिने आँखाले देख्न सक्छ ।
दुर्घटनालगत्तै बसका चालक इटहरी बालग्रामकै ४५ वर्षीय गोपाल नेपाली र बसलाई प्रहरीले नियन्त्रणमा लिएको थियो । तर पक्राउ परेको केही दिनपछि चालक र बसलाई प्रहरीले छाडेको थियो ।उपचार खर्च तिर्ने सर्तमा स्कुलले सहमतिको कागज गराए पनि अहिलेसम्म नतिरिदिएको रविनका बुबा भोला सरदारले बताए ।
आमा उकावतीले पैसा अभाव भएकाले अस्पतालमा छोरो रुँघेर बस्दा खानासमेत खान नपाएको र भोकभोकै बस्नु परिरहेको गुनासो गरिन् । छोराको प्रारम्भिक उपचारका लागि एक लाख ५० हजार ऋण गरेर र घरमा भएका हलगोरु बेचेर तिरेको उनले बताइन् । रविनले चलाएको मोटरसाइकलको पछाडि उनका काका सनजीत सरदार बसेका थिए । दुर्घटनामा सामान्य घाइते भएका उनी भने उपचारपछि घर फर्किएका छन् ।
अस्पतालका लेखा प्रमुख सुवास पोखरेलले रविनको उपचारमा ६ लाख ७० हजार रुपैयाँको बिल उठेको छ । दुई लाख ७५ हजार तिरिसकेको र तीन लाख ९५ हजार रुपैयाँ तिर्न बाँकी रहेको उनको भनाइ छ । त्योमध्ये एक लाख २० हजार रुपैयाँ भने स्कुलले उपलब्ध गराएको हो ।
प्रतिक्रिया