ताजा अपडेट
सीमाक्षेत्रबाट खुलेआम तेल तस्करी
झापा,चैत्र ४
सुनसरीको देवानगञ्जबाट पेट्रालियम पदार्थको खुलेआम तस्करी हुनेगरेको छ । भारतसँग सीमा जोडिएको घुस्की, साहेवगञ्ज र साविकको कप्तानगञ्ज नाकाबाट दैनिक डिजेल र पेट्रोलको तस्करी हुने गरेको छ ।
स्थानीयका अनुसार दैनिक त्यहाँबाट ग्यालिनमा राखेर तेल तस्करी भइरहेको छ । तर सम्बन्धित पक्ष तस्करी रोक्नमा लागिपरेको देखिँदैन । देवानगञ्जको गुप्ता आयत ट्रेडर्स र भगत आयत ट्रेडर्सबाट तेल तस्करी भइरहेको छ ।
देवानगञ्जका स्थानीय दिलीप यादवका अनुसार त्यहाँबाट दैनिक लगभग तीन हजार लिटर तेल तस्करी भइरहेको छ । मोटरसाइकलमा राखेर तेल तस्करी भइरहेको उनले बताए । बोर्डरमा सशस्त्र प्रहरीले निगरानी गरिरहेको भए पनि तस्करी रोकिन नसकेको उनको भनाइ छ ।
त्यहाँका किसानलाई पेट्रोलपम्पले तेल नभएको भन्दै फर्काउँदा किसान भने विराटनगर आउन बाध्य छन् । तर, तिनै पेट्रोलपम्पहरूले भारत तस्करी गर्न तेल जति पनि दिने गरेको अर्का स्थानीय कृषक महेश मेहताले बताए ।
प्रतिक्रिया