ताजा अपडेट
बलिउड अभिनेता आमिर खानले सामाजिक सञ्जाल प्रयोग नगर्ने घोषणा
बलिउड अभिनेता आमिर खानले सामाजिक सञ्जाल प्रयोग गर्न छोड्ने घोषणा गरेका छन् । सामाजिक सञ्जालमा कम मात्रामा सक्रिय रहने खानले ट्वीटरमा अन्तिम पोस्ट गर्दै यस्तो जानकारी दिएका हुन् ।
उनले हालै एक भिडियो पोस्ट गर्दै साथमा लेखेका छन्, ‘हेलो साथीहरु, मेरो जन्मदिनमा व्यक्त गरिएका शुभकामनाप्रति धेरै धेरै धन्यवाद । तपाईंका शुभकामनाले मेरो मुटु भरिएको छ ।
सामाजिक सञ्जालमा आमिर खानको अन्तिम पोस्ट
एउटा अर्को जानकारी दिन चाहन्छु कि सामाजिक सञ्जालमा यो मेरो अन्तिम पोस्ट हो । त्यसै पनि म निकै थोरै मात्र सामाजिक सञ्जालमा सक्रिय रहन्छु । यस्तोमा यो देखावटीको आवश्यकता छैन ।
हामी मानिसहरु पहिलेजस्तै आउँदा दिनमा पनि कुराकानी गर्दै गरौंला ।’ आमिर खानले भनेका छन् कि उनले आमिर राखन प्रडक्सनको नयाँ सामााजिक सञ्जाल अकाउन्ट बनाएका छन् । यही नयाँ ह्याण्डलमा आमिर खानका फिल्मको अपडेट आउनेछ ।
आमिर खानको बन्द गरिएको ट्वीटर अकाउन्ट
मार्च १४ अर्थात गत चैत १ गते मात्र अभिनेता खानले आफ्नो ५६ औं जन्मदिन मनाएका थिए । काममा ध्यान केन्द्रीत गर्न सामाजिक सञ्जाल प्रयोग गर्न बन्द गरेको उनले बताएका छन् ।
आमिर खानले यस किसिमको निर्णय लिएको यो नै पहिलो पटक भने होइन । यसै वर्षको फेब्रुअरीमा उनले आफ्नो आउँदो नयाँ फिल्म लालसिङ चड्डा रिलिज नहुञ्जेल मोबाइल अफ राख्ने निर्णय लिएका थिए ।
फोनले गर्दा आफ्नो काममा असर नपरोस् र ध्यान भंग नहोस् भन्ने हिसाबले उनले त्यस्तो निर्णय लिएका थिए । लालसिँह चड्डामा खानले करिना कपुरसँग स्क्रिन शेयर गरेको देख्न पाइनेछ ।
अहिले आमिर लालसिँह चड्डाकै काममा व्यस्त छन् । फिल्मको शुटिङ सम्पन्न भइसकेको भए पनि उनको टिम अहिले पोस्ट प्रडक्टसनको काममा लागिपरेको छ । लालसिँह चड्डा टम ह्याङ्स फरेस्ट गम्पको हिन्दी रिमेक फिल्म हो । यो फिल्म २०२१ को क्रिशमसमा रिलिज हुनेछ ।
प्रतिक्रिया