ताजा अपडेट
नेपालमा अस्पताल भर्ना भएका १७ प्रतिशत संक्रमित गम्भीर
स्वास्थ्य तथा जनसंख्या मन्त्रालयका अनुसार, पछिल्लो पटक गम्भीर बिरामीको संख्या दिनदिनै बढिरहेको छ। अहिलेसम्मको तथ्यांक अनुसार, अस्पताल पुगेकामध्ये १७ संक्रमितलाई आईसीयू तथा भेन्टिलेटरमा राख्नुपरेको छ।
अहिलेसम्म सक्रिय संक्रमितको संख्या देशभर ४८ हजार ७११ छ। त्यसमध्ये ४५ हजार १८१ जना सतर्कता अपनाएर घरमा बसिरहेका छन्।
स्वास्थ्य मन्त्रालयको तथ्यांक अनुसार, सक्रिय संक्रमितमध्ये तीन हजार ५३० जना सरकारी तथा निजी अस्पतालमा भर्ना भएका छन्। यो सक्रिय संक्रमितको ७.८१ प्रतिशत हो।
देशभर सरकारी तथा निजी अस्पतालमा उपचार गराइरहेका तीन हजार ५३० जनामध्ये ६०८ जनालाई आईसीयू तथा भेन्टिलेटरमा राखिएको छ। यो अस्पताल भर्ना भएका संक्रमितको १७ प्रतिशत हो।
गम्भीर बिरामीमध्ये पनि धेरैलाई आईसीयूमा राख्नुपरेको छ। देशभर ४७७ जनालाई आईसीयूमा राखिएको छ भने १३१ जनालाई भेन्टिलेटरमा राखिएको छ।
सबैभन्दा बढी गम्भीर बिरामी बागमती प्रदेशमा रहेको स्वास्थ्य मन्त्रालयले जनाएको छ। बागमतीमा २५४ जना आईसीयूमा र ७७ जना भेन्टिलेटरमा छन्। अस्पताल भर्ना भएका एक हजार ४८६ जनामध्ये ३३१ जना अर्थात् २२ प्रतिशत गम्भीर छन्।
त्यस्तै, प्रदेश १ मा अस्पताल भर्ना भएका २८२ जनामध्ये ५४ जनालाई आईसीयूमा र ५४ जनालाई भेन्टिलेटरमा राखिएको छ। यो अस्पताल भर्ना भएका संक्रमितको २४ प्रतिशत हो।
प्रदेश २ मा पनि अस्पताल भर्ना भएका ९७ जनामध्ये २४ जनालाई आईसीयूमा र दुई जनालाई भेन्टिलेटरमा राखिएको छ। यो २६ प्रतिशत हो।
गण्डकी प्रदेशमा अस्पताल भर्ना भएकामध्ये ५ प्रतिशत मात्रै गम्भीर देखिएका छन्। गण्डकीमा १०७ जना अस्पताल भर्ना भएका छन् भने पाँच जनालाई आईसीयू र एक जनालाई भेन्टिलेटरमा राखिएको छ।
लुम्बिनी प्रदेशमा ७७ जना आईसीयू र २१ जना भेन्टिलेटरमा छन्। यो अस्पताल भर्ना भएका ७७२ जनाको १२ प्रतिशत हो।
यस्तै, कर्णाली प्रदेशमा पनि गम्भीर बिरामीको प्रतिशत अत्यधिक छ। यहाँ अस्पताल भर्ना भएकामध्ये ३३ प्रतिशत संक्रमितको अवस्था गम्भीर देखिएको छ। कर्णालीमा अस्पताल भर्ना भएका ११३ जनामध्ये ३३ जनालाई आईसीयूमा र सात जनालाई भेन्टिलेटरमा राखिएको छ।
सुदूरपश्चिम प्रदेशमा भने गम्भीर बिरामीको ५.७९ प्रतिशत मात्रै छन्। अस्पताल भर्ना भएका ६७३ जनामध्ये ३० जनालाई आईसीयू र नौ जनालाई भेन्टिलेटरमा राखिएको छ।
प्रतिक्रिया