Hamro Bulletin

निषेधाज्ञाको बेला शून्य जस्तै भएका प्रहरी कार्यालयहरूमा निषेधाज्ञा खुकुलो भएको दुई दिनमै भिडभाड बढेको छ । निषेधाज्ञा कडा भएपछि प्रहरीमा उजुरी दिन नपाएकाहरूले असार ८ गतेदेखि निषेधाज्ञा खुकुलो भएसँगै उजुरी दिन पुगेका हुन् ।

निषेधाज्ञा खुलेसँगै प्रहरीमा सबैभन्दा बढी बैंङिक कसुर सम्बन्धि उजुरीहरू परेका छन् । त्यस्तै, घरेलु झगडा, मानहानीसम्बन्धि मुद्दा बोकेर आउनेको पनि उस्तै भीड देखिन्छ । महानगरीय प्रहरी परिसर काठमाडौंका अनुसार बैकिङ कसुरका एक हजारभन्दा बढी मुद्दाहरू पेन्डिङमा छन् । लकडाउन खुलेपछि अन्य समयमा भन्दा अपराध बढ्छ । प्रहरीमा नयाँ उजुरी बोकेर आउनेको पनि उस्तै भीड लागेको छ ।

सरकारले लकडाउन सुरु गरेपछि प्रहरीले जघन्य अपराध बाहेकका मुद्दा दर्ता रोकेको थियो । प्रहरी कार्यालयहरूले मंगलबारदेखि सबैखाले मुद्दा दर्ता गर्न थालेपछि उजुरी दिन पुग्नेको भिडभाड बढेको परिसर काठमाडौंका प्रवक्त रमेश बस्नेतले जानकारी दिए । उनका अनुसार निषेधाज्ञाको समयमा प्रहरीले सामान्य मुद्दालाई सार्दै आएको थियो भने पीडितहरू प्रहरीकहाँ आउन सकेका थिएनन् ।

निषेधाज्ञा खुकुलो भएपछि प्रहरीमा उजुरी हाल्न पुगेको भिड बढेको उनको भनाइ छ । ‘निषेधाज्ञा अवधिभर हिरासत कक्ष खाली जस्तै थियो, अहिले हिरासतमा ६ जना मात्रै छन्,’ उनले भने, ‘तर धेरैहरू पेन्डिङ रहेका छन्, जोहरी दिन आउनेको पनि भिडभाड बढेको छ ।’

उनले निषेधाज्ञाको समयमा कोभिड परीक्षण गरेर मात्रै हिरासतमा राखिने गरिएको बताए । पोजेटिभ देखिएकाहरूलाई महानगरीय प्रहरी वृत्त लैनचौर, दरबारमार्गमा राख्ने गरिएको छ । कोरोना संक्रमण दर बढिरहेको बेला सामान्य अपराधमा संलग्न व्यक्तिहरूलाई छुट दिएपछि अब भने कारबाही हुने प्रहरीले जनाएको छ । त्यस्तै हदम्याद भएका मुद्दाहरूलाई पनि प्रहरीले अघि सारेको छ । कोरोना महामारीको बेला सरकारले निषेधाज्ञा जारी गरे पनि पीडितहरू प्रहरी कार्यालयमा पुग्न सकेका थिएनन् । निषेधाज्ञा खुलेसँगै पीडितहरू प्रमाण बोकेर प्रहरीकहाँ धाउन थालेको परिसरका एसएसपी अशोक सिंहले जानकारी दिए ।

उनका अनुसार यो समयमा गम्भीर प्रकृतिका बाहेक अन्य उजुरीहरू प्रहरीले रोकेको थियो । तर, असहज, अप्ठेरोमा परेका र रोक्दा अप्ठेरो हुने किसिमका मुद्दाहरूमा भने प्रहरीले निरन्तर काम गर्दै आएको एसएसपी सिंहको भनाइ छ । उनले भने, ‘यो समयमा सबैभन्दा बढी बैंकिङ कसुरमा मुद्दा आएका थिए, तीनको हदम्याद हेरेर प्रहरीले फिर्ता गरेको थियो, अब त्यस्ता मुद्दामा पनि काम सुरु भएको छ ।’ उनका अनुसार निषेधाज्ञाको बेला सुनसान बनेका हिरासत कक्ष केही दिनमै भरिभराउ हुन सक्ने अनुमान प्रहरीले गरेको छ ।

सहरबजार खुलेको बेला, चोरी, लुटपाट, कुटपिट र हत्याजस्ता घटनाहरू हुने गरेको छ । प्रहरी प्रधान कार्यालयले निषेधाज्ञा खुकुलो भएपछि मातहतका कार्यालयलाई बक्यौता रहेका मुद्दा अघि बढाउन र नयाँ उजुरी दर्ता गर्न निर्देशन दिएको छ। उपत्यकाका सबैजसो प्रहरी कार्यालयहरूले मुद्दा दर्ता तथा कारबाही थालेका छन् ।

नेपाल प्रहरीका प्रवक्ता वसन्त कुवँरले निषेधाज्ञा केही खुकुलो भएसँगै सहरी क्षेत्रमा अराजक क्रियाकलाप बढ्न सक्ने भएकोले सबै प्रहरी कार्यालयलाई निगरानी बढाउन निर्देशन दिइएको छ । ‘निषेधाज्ञाको बेला सवारीसाधनबाट हुने दुर्घटनामा कमी थियो, अब दुर्घटना बढ्दे देखिन्छ, त्यस्तै चोरी र अन्य अपराध पनि बढ्ने देखिन्छ,’ उनले भने, ‘धेरैजसो प्रहरी कार्यालयहरूले नियमित काम कारबाही सुरु गरेका छन् ।’

यो समाचार आजको नागरिक दैनिकमा छ ।