Hamro Bulletin

कन्टिर–बाबूलाई उनका धेरै शुभचिन्तकले सोधिरहेका छन् सत्तामा नजाउन्जेलसम्म् मात्र त हो नि, नत्र ‘देउबा’ र ‘ओलीबा’मा के अन्तर छ ? वास्तवमा कन्टिर–बाबू यो प्रश्नको जवाफ दिन सकिरहेका छैनन् ।
 
शुभचिन्तकहरू भन्छन्– उनी पनि बा र यिनी पनि बा । कन्टिर–बाबूलाई लाग्छ– हो पनि । यिनलाई यिनको नामैले पनि बा बन्न सघाइरहेको छ, शेरबहादुर देउवा । कुरा खलास नि, नामैले बा बन्ने हैसियत राख्ने ‘शेवदे’को ‘खप्रओ’ले आरिस गरेर भयो ?

बजारकै चर्चा न हो, यतिबेला ओल्बा तातो रिसले जलिरहेका छन् रे, दनदनी । तर वाास्तविकतामा ओल्बा जलुन् या नजलुन्, उनको कुरा उनैले जानुन् । कन्टिर–बाबूको त्यसमा कुनै टिप्पणी छैन ।

कुरो तुलनाको निस्किहाल्यो । कन्टिर–बाबू देउवाबाबूलाई एउटा कुरा सुझाउन चाहिरहेका छन् । तर उनी चश्मा निकाल्दै लगाउँदै गरेर सोचिरहेका छन्– भन्ने कि नभन्ने ?

धेरैको गुनासो छ– देउवाले पनि ओल्बाकै पथ पच्छयाउन खोजेका त होइनन् ? यसै त केही भन्न नसकिएला । जम्मा तीन–चार दिन त भयो देउवाले पाँचौपटक शासनको बागडोर सम्हालेको । अहिले नै यस सम्बन्धमा टिप्पणी गर्नु हतारो हुनेछ सायद । 

काङ्ग्रेसका प्रवक्ताजीले पार्टीको काम सरकारी बङ्गला र स्रोतका आधारमा गर्ने कुरा हिजो गलत थियो र आज ठीक छ भनेर कसरी विज्ञप्ति जारी गर्ने होलान् ? 

कन्टिर–बाबू आन्तरिक गन्थन–मन्थन गर्दै फतफताउँछन्– तर कसैलाई कुनै राम्रो कुरो भन्न, सल्लाह दिन किन आइतबार कुरिरहनु ?

हो, काङ्ग्रेस कार्यकर्ताको ठूलो पङ्क्ति र धेरै जनतालाई हिजो उनले बालुवाटारको सरकारी निवासमा पार्टी पदाधिकारीको बैठक बोलाएको मन परेको छैन । कन्टिर–बाबूलाई पनि एकसुता मन परेको परेन त्यो कुरा । पहिले ओल्बाले पनि यसै गर्थे । आज देउवाले पनि त्यसै गर्न सुरू गरे ।

कन्टिर–बाबूको प्रश्न छ– किन होला ? हिजोको बैठक बालुवाटारमै गर्नुपरेको कारण चाहिँ के थियो ? जननेता बिपीको नाम जोडिएको, त्यत्रो बडेमानको पार्टी कार्यालय खाली नै छ । त्यहाँ पनि नभए नारायणथानकै बङ्गला सिङ्गै छ । जहाँ गरे पनि हुन्थ्यो नि !

हिजो यही गलत प्रवृत्तिको विरोध काङ्ग्रेसले गरेको होइन ? काङ्ग्रेसका प्रवक्ताजीले पार्टीको काम सरकारी बङ्गला र स्रोतका आधारमा गर्ने कुरा हिजो गलत थियो र आज ठीक छ भनेर कसरी विज्ञप्ति जारी गर्ने होलान् ? 

कन्टिर–बाबूलाई बडो औडाहा भइरहेको छ । खयर, हेर्दै जाऊँ ... आगे आगे होता है क्या ?