ताजा अपडेट
रिसको झोंकमा भतिजोद्वारा गरेको स्वीकार : संखुवासभा हत्या प्रकरण
संखुवासभाको मादी नगरपालिका–१ खोला गाउँमा भएको ६ जनाको हत्या प्रकरणमा छिमेकी एक जनालाई प्रहरीले पक्राउ गरेको छ । उनलाई हत्या अभियोगमा आज आइतबार सार्वजनिक गर्ने प्रहरीले जनाएको छ । हत्या रहस्मय बन्दै गएको भन्दै प्रहरीले प्राविधिक र मानवीय दुवै कोणबाट प्रहरीले अनुसन्धान शुरू गरेको थियो ।
एकै परिवारका ६ जना वृद्धदेखि बालबालिकासम्म बीभत्स हत्याको प्रहरीले सूक्ष्म ढंगले अनुसन्धान अगाडि वढाएको थियो । अनुसन्धानका क्रममा बीभत्स हत्या गर्ने अभियुक्त मृतकका भतिज २६ वर्षीय लोकबहादुर कार्की रहेका छन् । पक्राउ परेका उनले आफूलाई होच्याउने, अपशब्द बोल्ने, हेप्ने गरेकाले हत्या गरेको अनुसन्धान टोलीसँग स्वीकार गरेको प्रहरी स्रोतको भनाइ छ ।
संखुवासभा प्रहरी नायव उपरीक्षक लालध्वज सुवेदीले अनुसन्धानका लागि छिमेकी एक युवा पक्राउ गरिएको पुष्टि गर्नुभएको छ । पक्राउ परेका कार्कीलाई भने आज आइतबार सार्वजनिक गर्ने प्रहरीले बताएको छ । पक्राउ परेका अभियुक्तको घरबाट रगत लागेजस्तो देखिने धोएर राखेको सटको कपडा र घटनामा प्रयोग भएको हुन सक्ने हेम्बर पनि बरामद गरिएकोे छ ।
घटनामा के–कति जनाको संलग्नता रहेको र घटना गर्नुका कारणबारे थप अनुसन्धान भइरहेको छ । प्रहरी स्रोतका अनुसार लोकबहादुरले मृतक तेजबहादुरको मात्र हत्या गर्न खोजेका र परिवारका सदस्यले देखेपछि हत्या आरोपितले चिन्छ भनेर परिवारका अन्यको पनि हत्या गरेको स्रोतको भनाइ छ । ‘आरोपित कार्कीले नै हत्या गरेको विविध पक्ष र कारणबाट पुष्टि हुन्छ । यसबारेमा आज आइतबार सार्वजनिक गर्छौं ।’ –संखुवासभा प्रहरी नायव उपरीक्षक सुवेदीले बताउनुभयो ।
उक्त घटनाको अनुसन्धानका क्रममा जिल्ला प्रहरी कार्यालय संखुवासभा, संघीय प्रहरी एकाइ कार्यालय धरान, केन्द्रीय अनुसन्धान ब्युरो धरान, प्रदेश प्रहरीको रिजनल इन्भेस्टिगेसन टिम र अनुसन्धानलाई थप सहयोग गर्न १ नं. प्रदेश प्रहरी कार्यालयका डीआईजी अरणकुमार बीसी घटनास्थलमै रहेका छन् । घटनास्थलमा अनुुसन्धानका क्रममा ४० भन्दा बढी प्रहरी परिचालन गरिएको छ ।
घटनाको अनुसन्धानका क्रममा शनिबार ५ दिनसम्म १ दर्जनभन्दा बढी व्यक्तिमाथि प्रहरीले अनुसन्धान गरेको थियो । घटनामा ८५ वर्षीय बौद्धमान कार्कीकी श्रीमती ८४ वर्षीय पार्वती, ५८ वर्षीय छोरा तेजबहादुर, ५२ वर्षीया बुहारी कमला, ३२ वर्षीया नातिनी बुहारी रञ्जना, र ११ वर्षीय पनाति दिपेन, ७ वर्षीया पनातिनी गोमाको बीभत्स हत्या भएको थियो । उनीहरुको घरदेखि केही पर बाटो, खोल्सा र खरबारीमा बीभत्स हत्या गरेको अवस्थामा गाउँलेले शव फेला पारेका थिए ।
घरमा रहेका मृतक तेजबहादुरका बुबा ८५ वर्षीय बौद्धमान भने घरमै जीवित रहेका छन् । उनी न्यून दृष्टियुक्त रहेका छन् । मृतक तेजबहादुरका जेठो छोरा रमेश कार्की वैदेशिक रोजगारमा मलेसिया र कान्छो नरेश कार्की दुहवीमा वैदेशिक रोजगारमा गएका र नरेशकी श्रीमती तारा कार्की भने झापाको दमकमा बस्दै आएकी थिइन् । अहिले उनीहरु धरानस्थित स्वास्थ्य विज्ञान प्रतिष्ठान घोपा क्याम्पमा शवको पोस्टमार्टम र दाहसंस्कार गरी घर आइपुगेका स्थानीयले बताएका छन् ।
स्थानीयवासीले भने गाउँमा अज्ञात समूहले परिवारकै बीभत्स हत्या गरेपछि दोषीलाई तत्काल पक्राउ गरेर हदैसम्मको कानुनी कारबाहीका लागि प्रशासनसँग माग गरेका छन् । घटनास्थल जिल्लाको सदरमुकाम खाँदबारीबाट गाडी र पैदल गरी करिव ६ घण्टा टाढा रहेको छ ।
प्रतिक्रिया