अछाममा तिन दिन देखि सञ्चार, बिजुली र सडक अवरुद्ध

तीनदेखिको अविरल वर्षाले अछाममा सडक, विद्युत् र सञ्चार सेवा अवरुद्ध हुँदा सेवाग्राही मारमा परेका छन् । 

जिल्लाको गैरीटाड, कैलाशखोला, जनालीकोट, मार्कु र चौखुट्टेमा पहिरोले सडक अवरुद्ध हुँदा सयौं यात्रु अलपत्र परेका अछामका प्रहरी प्रमुख डिएसपी तुलसीराम अर्यालले बताए । उनका अनुसार डोजर प्रयोग गरेर बाटो खुलाउन पनि जोखिम रहेको छ । 'सानो डोजरले सडकको ढुंगा पन्छाउन सकेको छैन ।

ठूला डोजर सम्पर्क हुन सकेको छैन एकातिर बाटो अवरुद्ध छ भने अर्कोतिर टेलिफोन अवरुद्ध छ', उनले भने, 'टेलिफोन, विद्युत् र सडक एकैसाथ अवरुद्ध हुँदा कहाँ कति क्षति भयो जानकारी पाउन सकेको छैन ।' दसैं सकेर धेरै यात्रामा भएको बेला प्राकृतिक विपत्तिमा पर्दा धेरै तनावमा रहेको स्थानीय बताउँछन् ।

डोटीको शान्तिनगरलगायतका क्षेत्रमा पोलहरू ढलेकाले तीन दिनदेखि बिजुली अवरुद्ध भएको नेपाल विद्युत् प्राधिकरण अछाम वितरण केन्द्रका चित्र बजगाईंले बताए । 'यताउताबाट सडकलाई पहिरोले ढाकेको छ । पोल ढलेको स्थानमा गएर बनाउनलाई बाटो छैन । तर पनि स्थानीय प्रशासनसँग सहकार्य गरेर विद्युत् सञ्‍चालन गर्न प्रयास गरिरहेका छौं,' उनले भने ।