Hamro Bulletin

नेपाल पत्रकार महासंघले राजनीतिक दलको राजनीतिमा सक्रिय पत्रकारहरुलाई महासंघबाट राजीनामा दिन निर्देशन दिएको छ ।

एक चेतावनीपूर्ण विज्ञप्ति जारी गर्दै महासंघले राजनीतिक दलको कार्यकारी भूमिकामा निर्वाचित सदस्य तथा विभिन्न समितिका पदाधिकारीलाई महासंघ छोड्न भनेको हो । 

महासंघको सदस्यता लिएका पत्रकारले कुनै पनि राजनीतिक दलको कार्यसमिति, प्रतिनिधि वा उम्मेदवार हुन नपाउने भन्दै नैतिकता प्रदर्शन गर्दै महासंघको सदस्यबाट राजीनामा दिन आग्रह गरेको हो । 

‘महासंघका केन्द्रीय समिति, प्रदेश समिति वा शाखा समितिका पदाधिकारी तथा सदस्यले सो पदमा बहाल रहेको अवस्थामा कुनै राजनीतिक दल वा भातृ संगठनको कुनै पनि तहको विभाग वा समितिमा रही काम गरिरहेको अवस्थामा तथा कुनै राजनीतिक दलको प्रतिनिधि वा उम्मेदवार बनेको अवस्थामा उच्च नैतिकता प्रदर्शन गर्न महासंघ आग्रह गर्दछ’ विज्ञप्तिमा भनिएको छ । 

अहिले महासंघको केन्द्रीय समिति, प्रदेश समिति र जिल्ला समितिका धेरै पदाधिकारी अहिले नेपाली कांग्रेस, नेकपा एमाले र नेकपा माओवादी केन्द्रको अधिवेशनमा कार्यसमितिमा चुनिएका छन् भने महाधिवेशन प्रतिनिधि बनेका छन् । यसरी दलीय राजनीतिमा सहभागी भएकाहरुलाई महासंघ छाड्न आग्रह गरिएको हो ।