Hamro Bulletin

ग्लोबल आईएमई बैंकले देशव्यापी रूपमा डिजिटल साक्षरता अभियान चलाइरहेको छ । बैंकले देशभरका आफ्नो शाखा भएका सबै ठाउँमा प्रतिनिधि राखेर यो अभियान सञ्चालन गरेको हो । 

यो अभियानमा बजारमा डिजिटल प्रोडक्ट के–के उपलब्ध छन् ? डिजिटल बैंकिङ प्रोडक्टहरू कसरी प्रयोग गर्ने ? प्रयोग गर्दा ग्राहकलाई के फाइदा हुन्छ ? यो कत्तिको सुरक्षित छलगायत जानकारी दिइने ग्लोबल आईएमई बैंककी चिफ मार्केटिङ अफिसर शान्ता शिवाकोटीले जानकारी दिइन् ।  

‘डिजिटल बैंकिङ हुन्छ भन्ने धेरै जनालाई थाहा छ तर यसले के फाइदा पुग्छ भन्ने थाहा छैन । हामीसँग अभियानमा जोडिन आउनुभएका ग्राहकसँग एप छैन भने डाउनलोड गर्न लगाएर भए पनि तत्काल ट्रान्जेक्सन गर्न सिकाउँछौँ,’ उनले भनिन् । 

यो अभियानले ग्लोबल आईएमई बैंकको मात्र नभएर सबै देशलाई नै राम्रो उनले बताइन । पछिल्लो समयमा डिजिटल बैंकिङ बढे पनि जति हुनुपर्थ्यो, त्यति नभएका कारण यो अभियान सुरु गरिएको शिवाकोटीले जानकारी दिइन् । यो अभियानले विशेषत: दुर्गम भेगका ग्राहकहरू धेरै उत्साहित भएको उनको अनुभव छ । 

‘दुर्गम भेगमा थोरै रकम ट्रान्जेक्सन गर्न पनि २/३ घण्टा हिँड्नुपर्ने बाध्यता छ । उहाँहरूलाई डिजिटल ट्रान्जेक्सनका बारेमा सिकाउँदा निकै उत्साहित हुनुभयो,’ उनले भनिन् । 

यो अभियानअन्तर्गत एउटा ठाउँमा गरिएको कार्यक्रममा १ सय ५० देखि ३ सय जनालाई वित्तीय साक्षरता दिलाउने बैंकको लक्ष्य छ । हाल यो अभियान प्रदेश ३ मा काठमाडौं उपत्यकाबाहेक सबैजसो शाखामा सकिएको छ भने अन्य ठाउँमा पनि भइरहेको छ । हाल ग्लोबल आईएमई बैंकका ७६ वटा जिल्लामा गरी कुल २ सय ८७ वटा शाखाहरू छन् ।