Hamro Bulletin

बलात्कारको झुठा आरोप लगाउने एक युवतीलाई जिल्ला अदालत अछामले जेल सजाय सुनाएको छ । जिल्ला अदालत अछामले मंगलवार ती युवतीलाई तीन वर्ष ६ महिना जेल सजाय सुनाएको हो । न्यायाधिश नविन कुमार जोशीले बलात्कारको झुठा आरोप लगाउने कमलबजार नगरपालिकाकी १९ वर्षीय युवतीलाई जेल सजाय सुनाएको छ । ति युवतीले रामारोशन गाउँपालीका ४ बाटुलासैनका २० वर्षीय नन्दराम खनाललाई जबरजस्ती गरेको भन्दै फागुन १० गते जिल्ला अदालत अछाममा मुद्धा दायर गरेकी थिईन ।

बिहेको लागी कुरा गर्न खनाल आफन्त सहित माघ १५ गते ती युवतीको घरमा गएका थिए । सोहि दिन युवतीकै घरमा एकै कोठामा सुतिरहेको बेला एक पटक जबरजस्ती करणी गरेकी आरोप लगाएकी थिईन । बिवाह गरौ भन्दा युवकले घरमा मान्छे बितेको र उमेर पुुगेपछि बिहे गरौला भन्दा रिसले मद्धा दायर गरेको ती युवतीले अदालतको बकपत्रमा उल्लेख गरेकि छन ।

सहमतीमा करणी भएको र पछि रिसले जाहेरी दिएको व्यहोरा यवतीले बकपत्रमा उल्लेख गरेकी छन । पीडित भनीएकी युवतीले रिसले जाहेरी दिएको युवकलाई झुठ्ठा मुद्दामा फँसाउन खोजेको तथ्य फेला परेको फैसलामा उल्लेख गरिएको छ । झुठ्ठा मुद्दामा फसाईएका प्रतिवादी नन्दराम खनालले मुलुकी अपराध संहिता, २०७४ को दफा २१९ को उपदफा (१) र (२) विपरीतको कसूर गरेको तथ्य स्थापित नभएको अवस्थामा यी प्रतिवादीले अभियोग मागदावीबाट सफाई पाउने र झुठ्ठा जाहेरी दिएर प्रतिवादीलाई झुठ्ठा मुद्दामा फसाउने प्रयत्न गरे वापतमा ति किशोरीलाई मुलुकी फौजदारी कार्यविधी संहिता, २०७४ को दफा ४४ को उपदफा (२) को देहाय ( क१) बमोजिम ३ (तीन) वर्ष ६ महिना कैद हुने फैसला सुनाएको हो ।