Hamro Bulletin

हाम्रो बुलेटिन - सुचना को नयाँ आयम

शुक्रबार, १६ चैत २०८०

मोबाइल पसलमा लुटपाट गर्नेमध्ये नौ जना पक्राउ

मोबाइल पसलमा लुटपाट गर्नेमध्ये नौ जना पक्राउ

गत सोमबार साँझ गोंगबुस्थित लोत्से मलमा रहेको मोबाइल पसलमा लुटपाट गर्नेमध्ये नौ जनालाई प्रहरीले पक्राउ गरेर सार्वजनिक गरेको छ । बुधवार आयोजित पत्रकार सम्मेलनमा पक्राउ परेका ती नौ जना युवाहरुलाई सार्वजनिक गरिएको हो ।

जिल्ला प्रहरी परिसर काठमाडौंका प्रमुख एसएसपी दान कार्कीले मोबाइल पसल लुटपाटमा संलग्नमध्ये नौ जनालाई पक्राउ गरिएको जानकारी दिएका छन् ।

एसएसपी कार्कीले सामाजिक सञ्जालका फुटेजहरुका आधारमा छानबिनका क्रममा उनीहरुलाई पक्राउ गरिएको बताए । कार्कीका अनुसार चोरीका सामान नै बोकेका व्यक्तिहरु पक्राउ परेका हुन्, जसमा आगजनीमा पनि संलग्नहरु छन् ।

यहि विषयलाई लिएर बुधवार संसदमा अधिकांश सांसदहरुले प्रश्न सोधेका थिए ।

यो विषयमा प्रधानमन्त्री पुष्प कमल दाहाल प्रचण्डले पनि चासो व्यक्त गरेका छन् । प्रधानमन्त्री दाहालले गोंगबुमा भएको घटनाको गम्भीर रूपमा छानविन गर्न सुरक्षा अंगका प्रमुखहरूलाई निर्देशन दिएका छन् ।

प्रधानमन्त्री तथा मन्त्रिपरिषदको कार्यालय सिंहदरबारमा सुरक्षा अंगका प्रमुखहरुलाई निर्देशन दिँदै प्रधानमन्त्रीले घटनाको गहिरो गरी छानविन गर्न र अन्याय परेका सबैले समुचित न्याय पाउने गरी कार्वाही गर्न निर्देशन दिएका हुन् ।

प्रधानमन्त्री दाहालले भनेका छन्– ‘गोंगबुमा सोमबार भएको घटनालाई मैले गम्भीर रूपमा लिएको छु । राजधानीमा नै यस प्रकृतिका घटना हुँदा घटनालाई राज्यले गम्भीर रूपमा लिनु पर्छ । घटनाको पृष्ठभूमि के छ, के कारणले त्यस्तो अप्रिय घटना घट्न पुग्यो, त्यसमा दोषी कोको छन्, त्यो सबै कुराको गहिरो गरी अनुसन्धान गर्नुस् । लुटपाटको घटना झन् गम्भीर छ, त्यसमा दोषीलाई कार्वाही गर्नुस् र जो जो पीडित छन्, उनीहरूले छिटोभन्दा छिटो न्याय पाउने वातावरण बनाउनुस् ।’

प्रतिक्रिया