Hamro Bulletin

संघीय राजधानीको कालीमाटीमा मुलुककै सबै भन्दा ठूलो तरकारी बजार छ।

जहाँ देशभरबाट तरकारी संकलन हुन्छ र काठमाडौँ उपत्यकाभर बिक्री वितरणका लागि लगिन्छ। यो त्यही ठाउँ हो जहाँ तरकारीसँग जोडिएका विविध घटना भइरहन्छन्।

कहिले किसानको रोष सडकमा पोखिन्छ। कहिले तरकारी व्यवसायीबीचको झगडाले प्रशासनलाई तनाव दिन्छ। अनि कहिलेचाहिँ व्यवसायी र प्रशासनबीचको खटपटले यो बजार चर्चामा आउने गर्छ। जे होस्, वर्षमा कम्तीमा पनि २–३ वटा चर्चायोग्य घटना हुन्छन्। यस्ता चर्चा हुन्छन् र तत्काल सेलाउँछन्। यो सहरको विशेषता नै यही हो।

आइतबार फेरि कालीमाटी तरकारी बजार चर्चामा आयो। आफ्नो उत्पादन गोलभेडाको उचित मूल्य नपाएको भन्दै किसानले १ करोड रुपियाँ भन्दा बढी मूल्यको करिब ४ लाख किलोग्राम गोलभेडा सडक र बजार परिसरमै फ्याँकेपछि यो दृश्यले सञ्चार माध्यम मात्र नभई सबैको मन खिचेको हो।

यसरी पोखिएको चिजलाई सहज आँखाले हेर्दा गोलभेडा मात्र देखिए पनि खासमा यी प्रत्येक गोलभेडाका दानाभित्र किसानको मेहनत, श्रम र पसिना भरिएको छ। यसर्थ यो गोलभेडा हैन, उनीहरूको रोदन पोखिएको हो।