Hamro Bulletin

धनगढी । सुदूरपश्चिम प्रदेश सरकारले ल्याएको आगामी आर्थिक वर्ष २०८०/८१ को बजेटमाथिको छलफल आजदेखि शुरु हुने भएको छ ।

मंगलबार तीन बजे बस्ने प्रदेश सभा दोस्रो अधिवेशनको १६ औंं बैठकमा बजेटमाथिको छलफल अघि बढाइन लागेको हो ।
प्रदेशका सभामुख भीमबहादुर भण्डारीले आज तीन बजे प्रदेश सभा बैठक आह्वान गरिएको जानकारी दिए । उनले भने –‘प्रदेश सभा बैठक ३ बजे बस्दै छ । बजेटमाथिको छलफल अघि बढाइने कार्यसूचि रहेको छ ।’

प्रदेश सरकारले ल्याएको बजेटमाथि सत्तापक्ष दल तथा प्रतिपक्षी दलहरुको असन्तुष्टि रहेको छ । नेपाली काँग्रेसबाट मुख्यमन्त्री रहेका कमलबहादुर शाहको नेतृत्वको सरकारमा आर्थिक मामिला मन्त्री नेकपा एकीकृत समाजवादी पार्टीका नरेश बहादुर शाही रहेका छन् । तर, उनकै दलले बजेटमाथि असन्तुष्टि व्यक्त गरिरहेका छन् । संसदीय दलका नेता दीर्घबहादुर सोडारीले बजेटमाथि सरकारसंग कुनै पनि सहमति नभएको बताए । उनले सोमबार राती अवेरसम्म छलफल भएपनि बैठक अनिर्णित बनेको बताए ।

प्रदेशका मुख्यमन्त्री शाहले सत्तापक्ष दलहरुलाई सहमतिमा ल्याउन छुट्टाछुट्टै तथा सामुहिक छलफल गरिरहेका छन् ।