Hamro Bulletin

बैतडी,  बैतडीमा सडकमाथिबाट खसेको ढुंगा लागेर एक बालकको मृत्यु भएको छ भने एक बालक घाइते भएका छन् । जिल्लाको सिगास गाउँपालिका ४ रक्सौनका ९ बर्षीय रेशम विकको सडकमाथिबाट खसेको ढुंगा लागेर मृत्यु भएको हो ।

गुरलधार भन्ने स्थानबाट खसेको ढुंगा लागेर विकको मृत्यु भएको हो । सडक तलतिर बालबालिकाहरु खेलीरहेको अवस्थामा कच्ची सडकमाथिबाट एक्कासी ढुंगा खसेको थियो । शुक्रबार दिउँसो बालबालिकाहरु खेलीरहेको अवस्थामा खसेको ढुंगा लागेर रेशमको घटनास्थलमै मृत्यु भएको स्थानीय बल्देव विकले बताए ।

जनाधार आधारभूत विद्यालयमा कक्षा १ मा पढ्ने रेशम कलिलै उमेरमा अस्ताएपछि अहिले गाउँ शोकमा डुबेको छ । घरमा उनकी आमा मात्रै रहेको बताइएको छ । रेशमका बुवा दिपक लुहार रोजगारीको सिलसिलामा भारतमा रहेका छन् । यस्तै ढुंगा लागेर सिगास गाउँपालिका ३ गजेडाका ७ बर्षीय अनिल चुनारा घाइते भएका छन् । उनको धनगढीमा उपचार भइरहेको छ । मामा घर आएका चुनारापनि बालबालिकाहरुसंगै खेल्न गएका थिए ।

सडकमाथिबाट खसेको ढुंगा लागेर एक बालकको मृत्यु र एक बालक घाइते भएपछि अहिले गाउँ शोकमग्न भएको छ । मृतक रेशमकी आमा विक्षप्त भएकी छन् । एकमात्रै छोराको ढुंगा लागेर मृत्यु भएपछि उनी होसमा आउन सकेकी छैनन् ।