Hamro Bulletin

डडेल्धुरा । उग्रतारा–मेलौली सडक थप कालोपत्रे गर्न चालू आर्थिक वर्षमा साढे १६ करोड बजेट विनियोजन गरिएको छ । डडेल्धुराको उग्रतारा मन्दिरदेखि बैतडीको मेलौली हुँदै पञ्चेश्वर गाउँपालिकासम्म जोड्ने राजमार्गको थप ६ किलोमिटर सडक कालोपत्रे गर्नका लागि साढे १६ करोड विनियोजन गरिएको हो ।

संघीय सरकारले १५ करोड र प्रदेश सरकारले डेढ करोड उक्त सडक कालोपत्रेका लागि विनियोजन गरेको पूर्वाधार विकास कार्यालय डडेल्धुराले जनाएको छ । ‘गत वर्ष अजयमेरु गाउँपालिकाको वडा नम्बर १ बयलडाँडादेखि वडा नम्बर २ चमडा सम्मको १० किलोमिटर सडक कालोपत्रे गर्नका लागि ठेक्का भएको थियो,’ कार्यालय प्रमुख नवराज रावलले भने, ‘तर निर्माण व्यवसायीले ढिलाई गर्दा ७ किलोमिटर मात्रै कालोपत्रेको काम सम्पन्न भयो । बसाना गाड क्षेत्रमा बाँकी रहेको तीन किलोमिटर सडक कालोपत्रे यस वर्ष हामी गर्छौ ।’

उनका अनुसार बसना गाडमा पुल निर्माणका लागि पनि एक करोड बजेट छुट्याइएको छ । ‘पुल निर्माणका लागि पनि चालू आर्थिक वर्षभित्रै ठेक्का गर्छौ,’ उनले भने । यस्तै संघीय सरकारले १५ करोड बजेट विनियोजन गरेपछि सडक डिभिजन कार्यालय कुलपाते डोटीले चमडा अगाडिको सडक खण्डमा कालोपत्रे गर्ने भएको छ ।

कार्यालयका इन्जिनियर पदम पन्तका अनुसार चालू आर्थिक वर्षमा कुलपातेमार्फत कम्तिमा पनि ३ किलोमिटर सडक कालोपत्रे हुने भएको छ । ‘पूर्वाधार विकास कार्यालयले गरेको कालोपत्रेकै मापदण्डअनुसार डिभिजन सडक कार्यालयले पनि कालोपत्रे गर्छ,’ उनले भने, ‘यसवर्ष १५ करोड बजेट छुट्याइएको छ । कम्तिमा पनि ३ किलोमिटर हामीले कालोपत्रे गर्छौं ।’

उग्रतारा–मेलौली राजमार्गअन्तर्गत पहिलोपटक आर्थिक वर्ष २०७४/०७५ मा अमरगढी नगरपालिका–७ रातागौनबाट अजयमेरु गाउँपालिका–१ बयलडाँडासम्म ८ किलोमिटर सडक कालोपत्रे गरिएको थियो । गत वर्ष ७ किलोमिटर कालोपत्रे गरिएकोमा यस वर्ष थप ६ किलोमिटर कालोपत्रे हुने भएको हो ।