मन्त्रालयको कोठामा विद्युत् शर्ट भएर आगलागी, सिंहदरबारमा खैलाबैला !

हाम्रो बुलेटिन बुधबार ११, पुष २०८० १६:३७

मन्त्रालयको कोठामा विद्युत् शर्ट भएर आगलागी, सिंहदरबारमा खैलाबैला !

सरकारको प्रमुख प्रशासनिक केन्द्र सिंहदरबारस्थित वन तथा वातावरण मन्त्रालयको एक कोठामा विद्युत् शर्ट भएर आगलागी भएपछि बुधवार एकछिन खैलाबैला मच्चिएको छ ।

बुधवार दिउँसो साढे २ बजेको समयमा वन मन्त्रालयमा आगलागीको हल्ला फैलिएको थियो । मन्त्रालयको चौथो तलामा रहेको प्राविधिक उपसचिव परशुराम पौडेलको कोठामा विद्युत् शर्ट भएर आगलागी भएको थियो । काठमा जोडिएको विद्युत मल्टिप्लगमा आगो लागेको थियो ।

शर्ट सर्किटको गन्ध फैलिएपछि कर्मचारीहरूबीच एकछिन भागदौड मच्चिएको थियो । त्यसपछि ४ सय १० नम्बरको कोठा खोल्दा धुँवैधुवाँले भरिएको थियो । पौडेल भने बुधवार कार्यकक्षमा थिएनन् ।

तत्कालै नियन्त्रणमा लिइएका कारण कुनै क्षति भने भएको छैन । धेरै हिटर एकसाथ बालिएका कारण तार जलेर आगो सल्केको एक कर्मचारीले बताए ।

जाडोको समयमा सिंहदरबारस्थित मन्त्रालयका प्रायः कोठामा हिटर बाल्ने गरेको पाइन्छ ।