Hamro Bulletin

साँफेबगर नगरपालिका ४ पुलबजारमा बाढी पसेको छ । मंगलवारदेखि परिरहेको अविरल वर्षाका कारण बुढीगंगा नदिमा आएको बाढी बस्तीमा पसेको हो । पुलबजारका ५० भन्दा बढी घर बुढीगंगा नदिको जोखिममा छन् । विहान ७ बजेतिर बाढी बजारमा पसेको स्थानीय चेतन गन्र्धवले बताए । अहिले पानी रोकिएसंगै बस्तीमा पसेको बाढी कम हुदै गएको गन्र्धवले बताए । बर्षायाम सधै त्रासपुर्ण अवस्थाले बित्ने गरेको उनले बताए ।

छिपेखोलामा आएको बाढीले छेउछाउमा घरहरु जोखिममा रहेका छन् । जोखिम आकल नै नगरि मापदण्ड विपरित खोलाको छेउमा बनाईएका घरहरु वषौयाममा सधै कटानको जोखिममा पर्ने गरेका छन् । लगातारको बर्षा र बाढीका कारण स्थानीयहरु त्रसित बनेका छन् । बुढीगंगामा आएको बाढीले नदि आसपासका खेतियोग्य जमिन समेत कटान गर्न थालेको छ । निरन्तर परिरहेको वर्षाका कारण बुढीगंगा,छिपेखोला,प्रभाली खोलामा बाढी आएको छ ।

२०७८ कार्तिक महिनामा आएको बाढीले साँफेबगर नगरपालिका ४ मष्टामाण्डौको ७४ रोपनी र रिडिकोटमा २८ रोपनी खेतियोग्य जमिन बगाएको थियो । नदिको कटानका कारण साँफेबगर नगरपालिकाको कार्यालय र एयरपोर्ट लगायत सयौं घरहरु समेत जोखिममा रहेका छन् । जिल्ला विपद् पूर्वतयारी तथा प्रतिकार्य योजनाको सर्भेअनुसार जिल्लाका दश पालिकाका ९१ वडा मध्ये ४१ वडाहरु बाढी तथा पहिरोको उच्च जोखिममा रहेको उल्लेख गरेको छ । साँफेबगर नगरपालिकाको ८ वटा वडा,मंगलसेन नगरपालिकाको ८,पञ्चदेवल बिनायक नगरपालिकाको ५,कमलबजार नगरपालिकाको ६,बान्नीगढी जयगढ गाउँपालिकाको २,तुर्माखाँद गाउँपालिकाको ६,ढकारी गाउँपालिकाको ६ वटा वडा गरी ४१ वडा बाढी पहिरो तथा कटानको उच्च जोखिममा रहेको जिल्ला प्रहरी कार्यालयले जनाएको छ । जिल्ला प्रहरी कार्यालयको तंथाक अनुसार गत आर्थिक वर्षमा पहिरो परि जिल्लामा २५ जनाको मृत्यु भएको थियो भएको थियो १४ भन्दा बढी घाईते भएका थिए ।