ताजा अपडेट
अपिहिमालका स्थानीयको दुःख– सात किलोमिटर सडक माग्न काठमाडौंतर्फ
दार्चुला– सडक सञ्जालले नजोडिएको पालिका सदरमुकाम हो, दार्चुलाको खण्डेश्वरी । बिटुले–पारिबगर हुँदै मकरी गाडसम्म सडक पुगे पनि पालिका केन्द्र सडक सञ्जालले जोडिएको छैन । गाउँसम्म सडक नपुगेको भन्दै अपिहिमाल गाउँपालिकाका अगुवाहरू सडक माग्न काठमाडौं हिँडेका छन् ।
प्रधानमन्त्री केपी ओलीलाई भेटेरै अपिहिमालका बासिन्दाका पिरमर्का सुनाउन र सडकका बजेट माग्न काठमाडौं हिँडेको अपिहिमाल गाउँपालिकाका निवर्तमान अध्यक्ष धर्मानन्द मन्यालले बताए । ०७४ मा स्थानीय तहमा जनप्रतिनिधि आएपछि पारिबगरबाट मकरी गाडसम्म सडक पुग्यो । ०७८/७९ मा मकरी गाडदेखि खण्डेश्वरी जोड्न सडक अगाडि बढेको थियोे । ‘अहिले सडकमा बजेट आउनै छोड्यो,’ मन्यालले भने, ‘सडकले गति लिएन । कसैको पहल भएन ।’
एमाले पालिका कमिटीले निर्णय गरेरै सोमबार दार्चुलाबाट आठजनाको टोली काठमाडौंका लागि हिँडेको छ । पूर्वमन्त्री गणेशसिंह ठगुन्नाले प्रधानमन्त्रीसँग भेटघाटका लागि समन्वय गरिरहेका छन् । अपिहिमालका स्थानीयले सडक नहुँदा मकरी गाडदेखि भरिया र खच्चडमार्फत सामान ढुवानी गर्नुपरेको छ । मकरी गाडबाट खण्डेश्वरीसम्मकै भाडा १० रुपैयाँ प्रतिकिलो हुन जान्छ । ढुवानी महँगो भएका कारण स्थानीयले महँगीको मार खेप्नुपरेको अपिहिमाल गाउँपालिका– २ का स्थानीय प्रकाशसिंह धामीले बताए । उनले भने, ‘सडक नहुँदा भारी बोक्नुपर्ने स्थानीयको बाध्यता छ ।’
बिरामी हुँदा पनि बोकेरै मकरी गाड पुर्याउनुपर्छ । जटिल बिरामी भयो भने बाटोमै ज्यान जान सक्ने जोखिम छ । स्थानीय सरकारले पहल नगर्दा अहिले पार्टीको निर्णयअनुसार सडक माग्न काठमाडौं जानुपरेको शान्ति धामीले बताइन्
मकरी गाडमा १० मेगावाट जलविद्युत् आयोजना बन्दा सडकले चाँडो गति लिएको थियो । अहिले मकरी गाडबाट दुई किलोमिटर मात्रै सडकको ट्र्याक खुलेको छ । बजेट नआएको एक वर्षभन्दा धेरै भइसकेकाले काम हुन सकेको छैन । यो वर्ष सडकको ट्र्याक खुलाउन एक करोड बजेट विनियोजन भएको सडक डिभिजन कार्यालय बैतडीका निमित्त कार्यालय प्रमुख लक्ष्मणदत्त जोशीले बताए । ‘मकरी गाडदेखि अपिहिमाल गाउँपालिका केन्द्र जोड्ने सडकको ट्र्याक खुलाउन अहिले बोलपत्र आह्वान गरिएको छ । यो बजेटले कति काम गर्न सकिन्छ ।’ अहिले खुलाइएको दुई किलोमिटर सडकको पनि पर्खालदेखि सडक मोड सुधारको काम बाँकी छ ।
पालिकासम्म ७ किलोमिटर दूरी हो । पाँच किलोमिटर पूरै कडा चट्टान (हार्ड रक) छ । बजेट पर्याप्त भए सडकको काम अलि माथि पुर्याउन सकिन्छ । मकरी गाडदेखि माथिल्लो भेगमा अधिकांश ठाउँमा कडा चट्टान छ । चट्टान फोड्न सके मात्रै अपिहिमाल गाउँपालिका केन्द्रनजिक सडक पुर्याउन सहज हुने जोशी बताउँछन् ।
प्रतिक्रिया