Hamro Bulletin

धनगढी– ३३ औं अन्तर्राष्ट्रिय लैंगिक हिंसा विरुद्धको १६ दिने अभियान सोमबारदेखि शुरु भएको छ । ‘हामी सबैको प्रतिवद्धता लंैगिक हिंसा अन्त्यको लागि ऐक्यवद्धता’ भन्ने मूल नारा सहित सोमबारदेखि कैलाली र कञ्चनपुरका स्थानीय तहमा विविध सचेतनामुलक कार्यक्रम गरि मनाइन लागेको हो ।

सोमबार धनगढीको ट्राफिक चौराहदेखि बाजाँगाजाँसहित प्रभातफेरीको आयोजना गरि अभियानको शुभारम्भ गरिएको छ ।
लिङ्गका आधारमा हुने सबैखाले हिंसा अन्त्यका लाग स्थानीय तहमा सचेतनामूलक कार्यक्रम गरिने जनाइएको छ ।

हरेक बर्ष नोभेम्बर २५ देखि डिसेम्बर १० सम्म लैङ्गिक हिंसाविरुद्धके १६ दिने अभियान सञ्चालन गरिदै आएको छ ।

कैलाली कञ्चनपुरमा गैरसरकारी संस्था महासंघ सुदूरपश्चिम प्रदेशको नेतृत्वमा २२ वटा गैरसरकारी संघसंस्थाले संयुक्त रुपमा लैङ्गिक हिंसाविरुद्धको १६ दिने अभियान सञ्चालन गर्न लागेको जनाइएको छ ।

लैङ्गिक हिंसाविरुद्ध सचेतनाको लागि पालिकामा अन्तरक्रिया, ¥याली, अभिमुखीकरण, घुम्ती शिविर, सडक नाटक लगायतको सचेतनामूलक कार्यक्रम गर्ने आयोजकहरुले जनाएका छन् ।

अभियान अवधिभर कैलालीको १३ र कञ्चनपुरको एक सहित १४ वटा पालिकामा लैङ्गिक हिंसा अन्त्य सम्बन्धी विविध कार्यक्रम गरिने महासङ्घका प्रदेश अध्यक्ष देवीप्रसाद खनाल जानकारी दिए । उनले लैङ्गिक हिंसा, बाल विवाह, आत्महत्या, लागु हिंसा लगायत सबै हिंसाविरुद्ध जनचेतनामूलक कार्यक्रम गरिन लागेको बताए ।

सन् १९६० नोभेम्बर २५ मा डोमिनिकन गणतन्त्रका तत्कालीन राफेल ट्रिजुलो तानासाही सरकारले मिरावेल परिवारका तीन साहसी दिदीबहिनी पेट्रिया, मिनर्भा र मारियाको हत्या गरेपछि ल्याटिन अमेरिकी देशमा हिंसाविरुद्धको दिवसका रूपमा मनाईदै आएको छ ।

सन १९९९ मा संयुक्त राष्ट्र सङ्घले सोही दिवसलाई आत्मसाथ गर्दै नोभेम्बर २५ का दिनमा संसारभर नै महिला हिंसाविरुद्धको अन्तर्राष्ट्रिय दिवसका रूपमा स्थापित गरेको थियो ।