ताजा अपडेट
सुदूरपश्चिममा चुनावी सरगर्मी, ५ पदका लागि २६ उम्मेदवार चुनावी मैदानमा
धनगढी । उपनिर्वाचनको मिति नजिकिदै गर्दा सुदूरपश्चिममा चुनावी सरगर्मी बढेको छ । यहाँ रिक्त ५ पदका लागि हुने उपनिर्वाचनको चुनावी सरगर्मी बढेको हो । यहाँ ३ जना स्वतन्त्र उम्मेदवारसहित विभिन्न राजनीतिक दलका २६ जना चुनावी मैदानमा छन् । यही मंसिर १६ गते हुने उपनिर्वाचनमा सुदूरपश्चिममा १ गाउँपालिका उपाध्यक्षसहित ४ वडाअध्यक्ष गरी ५ पदको लागि प्रतिश्पर्धा हुँदैछ ।
बाजुराको स्वामीकार्तिक खापर गाउँपालिकाको उपाध्यक्ष पदका लागि नेपाली कांग्रेसबाट पुल्तीसरा शाही, एकीकृत समाजवादीबाट जवा शाही, एमालेबाट सुलोचनाकुमारी भण्डारी चुनावी प्रतिस्पर्धामा छन् । बझाङको सुर्मा गाउँपालिका-४ को वडाअध्यक्ष पदको लागि एमालेबाट लखीचन्द्र बोहरा, कांग्रेसबाट धिरेन्द्र पुजारा र माओवादी केन्द्रबाट पुस्करबहादुर बोहरा गरी ३ जना उम्मेदवार चुनावी मैदानमा छन् ।
डोटीको पुर्वीचौकी गाउँपालिका-६ को वडाअध्यक्ष पदको लागि एमालेबाट देवबहादुर थापा, कांग्रेसबाट मोहन थापा, माओवादी केन्द्रबाट देवीलाल थापा र राष्ट्रिय स्वतन्त्र पार्टीबाट जानकी कुमारी खड्का गरी ४ उम्मेदवार मैदानमा छन् । दार्चुलाको दुहुँ गाउँपालिका-५ को वडाअध्यक्ष पदको लागि एमालेबाट मानसिंह बडाल, कांग्रेसबाट धनसिंह कुँवर, माओवादीबाट वीरसिंह कार्की र स्वतन्त्रबाट लालबहादुर कुँवर गरी ४ जना उम्मेदवार चुनावी प्रतिस्पर्धामा छन् ।
त्यस्तै कञ्चनपुरको भीमदत्त नगरपालिका-६ मा पनि वडाअध्यक्ष पदको लागि प्रतिश्पर्धा हुँदैछ । सो पदका लागि सबैभन्दा बढी १२ जना चुनावी मैदानमा उत्रिएका छन् । एमालेबाट बहादुर चन्द, कांग्रेसबाट प्रकाश चन्द, माओवादीबाट नानाराम कोली, राष्ट्रिय स्वतन्त्र पार्टीबाट रामदत्त भट्ट, राप्रपाबाट सुशिलकुमार भट्ट, जनमत पार्टीबाट यादवबहादुर चन्द, एकीकृत समाजवादीबाट जितेन्द्रबहादुर चन्द, नागरिक उन्मुक्ति पार्टीबाट हरिष डगौरा, नेपाल मजदुर किसान पार्टीबाट दलबहादुर बोहरा, राप्रपा नेपालबाट दिलबहादुर धामी, स्वतन्त्रबाट युवराज चन्द र स्वतन्त्रबाट थानेश्वर लेखक चुनावी मैदानमा उत्रिएका छन् ।
प्रदेश निर्वाचन कार्यालय धनगढीका निर्वाचन अधिकारी प्रेमराज भटट्का अनुसार चुनावी मैदानमा रहेका उम्मेदवारहरुलाई निर्वाचन आयोगले यसअघि नै निर्वाचन चिन्ह प्रदान गरिसकेको छ । निर्वाचन चिन्ह प्राप्त गरिसकेपछि उम्मेदवारहरु आ आफ्नो चुनावी गतिविधिलाई तीव्रता दिएका छन् ।
जिल्ला समन्वय समिति कैलाली प्रमुखमा भने यसअघि नै नेपाली कांग्रेसबाट उम्मेदवारी दिएकी टीकाकुमारी चौधरी (भूल) निर्विरोध निर्वाचित भइसकेकी छन् । निर्वाचन कार्यक्रम अनुसार मंसिर ६ देखि मंसिर १३ गते राति १२ बजेसम्म उम्मेदवारले प्रचारप्रसार गर्न पाउनेछन् । मंसिर १३ गते राति १२ बजेदेखि मतदान सम्पन्न नभएसम्म निर्वाचन प्रचारप्रसार निषेध अवधि तोकिएको छ ।
निर्वाचन आयोगबबाट निर्वाचन आचारसंहिता मंसिर २ गतेदेखि जारी भइसकेकाले उक्त आचारसंहितको अक्षरसः पालना गरी निर्वाचन प्रचारप्रसारको कार्य गर्न गराउन सम्बन्धित सबै राजनीतिक दल, उम्मेदवार तथा निर्वाचन सरोकारवालालाई आयोगले अनुरोध गरेको छ ।
सम्बन्धित समाचार
ट्रेन्डिङ
ताजा अपडेट
-
साँफेबगर नगरपालिका र खाद्य व्यवस्था कम्पनीबीच सम्झौता, अब किसानको उत्पादन सिधै डिपोमार्फत बजारमा
-
उज्यालो बाँड्ने शिक्षक अझैं सम्पर्क बिहिन, परिवार अन्धकारमा
-
अछामी सम्पर्क समिति युएई : प्रेम बोगटीको नेतृत्वमा नयाँ कार्यसमिति चयन
-
एनआरएनए तास्मानिया राज्य समिति सदस्यमा खेम कुँवरको उम्मेदवारी घोषण
-
दश करोडमा खेलकुद मैदान निमार्ण गरी हस्तान्तरण
प्रतिक्रिया