ताजा अपडेट
प्रदेश सभाको गतिविधिमा सन्तुष्ट छैनन् सुदूरपश्चिमका सांसद
कैलाली । सुदूरपश्चिम प्रदेश सभा सदस्यहरूले प्रदेश सभाको गतिविधिबारे असन्तुष्टि व्यक्त गरेका छन् । धनगढीमा सोमबार आयोजना गरिएको संसदीय खुल्लापन, अवधारण र अध्यास सम्बन्धी छलफल कार्यक्रममा उपस्थित भएका प्रदेश सभा सदस्यहरूले प्रदेश सभाको गतिविधि र कामहरू बारे सन्तुष्टि व्यक्त गर्ने कुनै आधार नभएको टिप्पणी गरेका हुन् । कतिपय सांसदहरूले आफ्नै भूमिका पनि प्रभावकारी हुन नसकिरहेको बताएका थिए ।
उनीहरुले थुप्रै आश्वासन जनतालाई बाढेको तर, अहिले ती आश्वासन पुरा गर्न सक्ने अवस्था नरहेको जिकिर गरे । केही सांसदहरूले आफूले गरेको काम समेत नदेखिएको भन्दै आफूहरूले तलब भत्ता खान समेत सकस भइरहेको टिप्पणी गरेका थिए । ‘प्रदेश सभा भित्र जति काम भएपनि पहिलो प्रदेश सभाले गरेको छ । हामी आएपछि केही काम देखिएको छैन। तलब भत्ता खाएको पनि अमिलो लाग्छ’ माओवादी सांसद शिवसिंह ओलीले भने, ‘अहिलेसम्म हामीले एउटा पनि कानुन बनाउन सकेका छैनौँ ।
जनताले आभास हुनेगरि काम गर्न सकेका छैनौँ । ’ एमाले संसदीय दल उपनेता सन्तोस कुमारी थापा शर्माले कानुन निर्माणलगायतका विषयमा जनताको सहभागिता हुन नसकिरहेको बताएकी थिइन् । सूचना र पारदर्शिता कमजोर रहेको बताउँदै उनले प्रदेश सभाले जति गर्नु पर्ने त्यति गर्न नसकेको बताइन् । एमालेकै सांसद धर्मराज पाठकले सांसदका गतिविधिहरूलाई प्रविधिसँग जोड्नु पर्नेमा जोड दिएका थिए । संसद् र संसदीय समिति गतिविधिहरू प्रभावकारी हुन नसकिरहेको समेत उनले बताए । सांसद जानकी ऐर बमले संसदीय गतिविधिलाई नागरिकसम्म पुराउनु पर्ने बताइन् ।
माओवादीका उपनेता अक्कल रावलले संसद् र सांसदको भूमिका कारण प्रदेशमा भ्रष्टाचार मौलाएको बताए । सरकारले विधेयक ल्याउन नसक्दा प्रदेश सभा कामविहीन भएको उनको भनाइ थियो । माओवादी सांसद रमेश धामीले दुई वर्षसम्म पनि जनताले अपेक्षा गरे अनुसारको काम हुन नसकेको स्वीकार गरेका थिए ।
माओवादी सांसद लक्ष्मि विकले कानुन निर्माणको विषयमा सबै भन्दा कमजोर सुदूरपश्चिम प्रदेश रहेको बताइन् । नागरिक उन्मुक्ति पार्टीका सांसद रामेश्वर चौधरीले प्रदेश सभा स्वायत्त हुँदा पनि भूमिका प्रभावकारी हुन नसकिरहेको भन्दै गुनासो गरेका थिए ।
कार्यक्रममा उपस्थित इन्सेकका खडकराज जोशी र गैरसरकारी संस्था महासङ्घ सुदूरपश्चिममा अध्यक्ष देवी खनालले प्रदेश सभा प्रभावकारी नहुँदा सङ्घीयता प्रति नै प्रश्न उठिरहेको बताएका थिए । कार्यक्रममा संसदीय रिपोर्टिङ गरिरहेका पत्रकारहरूले संसद्मा देखिएको अवस्थाबारे चित्रण गरेका थिए ।
प्रतिक्रिया