Hamro Bulletin

धनगढी– दक्षिणपट्टी छ मोहना खोला । त्यसको छेउमा छ धनगढी उपमहानगरपालिकाद्धारा निर्मित त्रिवेणी घाट । घाँटभित्र बनाइएको छ शव दाहस्थल र कृया घर । तर, अहिले संरक्षणको अभावमा सो घाँट दुर्गन्धित र जिर्ण बन्दै गएको छ ।

धनगढी उपमहानगरपालिका वडा नम्बर ९ मा पर्ने घाँटको संरक्षणमा उपमहानगरपालिकाले जोड नदिँदा जिर्ण बन्न थालेको स्थानीयहरु बताउँछन । कृया घरमा लगाइएको झयालका सिसा फुटाइएका छन । अन्य संरचनामा पनि तोडफोड भएको छ तर, यसको संरक्षणका लागि उपमहानगपालिकाले ध्यान दिन नसकेको स्थानीयहरुले बताए ।

घाँटका संरचनामात्र नभई सो घाँटमा शब दाह गर्न जाने मानिसहरुले त्यहाँ जथाभावी फोहोर फाल्ने गरेका छन । तर त्यसको पनि व्यवस्थापन गर्नमा उपमहानगरपालिकाले जोड नदिएको उनीहरु बताउँछन ।

वडा नम्बर ९ का वडा अध्यक्ष  प्रेमराज भण्डारीले उपमहानगरपालिकालाई एक जना जनशक्तिको व्यवस्थापन गर्न माग गर्दा समेत ध्यान नदिएको बताए । उनले भने –‘हामीले उपमहानगरपालिकासंग पटक–पटक त्रिवेणी घाँटमा कर्मचारी खटाउन माग गरेका थियौ । तर, उपमहानगरपालिकाले वेवास्ता गर्दै आएको छ ।’

उनले फोहोर व्यवस्थापन नहुनु र संरचना जिर्ण हुँदै जानुले उपमहानगरपालिकाको लगानीनै सदुपयोग हुन नसकेको बताए । उनले भने –‘कर्मचारीको व्यवस्थापन भएको भए त्यहाँका संरचना सुरक्षित राख्न सकिने थियो । त्यहाँ खानेपानी, विद्युत लगायतको व्यवस्थापन हुन पनि जरुरी छ ।’

उनले यस वर्ष वडा कार्यालयले सो घाँटमा सरसफाई गर्न एक लाख बजेट व्यवस्थापन गरेको बताए । धनगढी उपमहानगरपालिकाको सरसफाई शाखा  प्रमुख अशोक अवस्थीले सो घाँटमा सरसफाईका लागि माग आए आफुहरुले कर्मचारी खटाउने गरेको बताए । तर, संरचना संरक्षणको पाटो आफनो क्षेत्राधिकारमा नरहेको उनको भनाई छ ।

उनले भने –‘जथाभावी फोहोर भयो भनेर गुनासो आए कर्मचारी खटाएर फोहोर उठाउने गरेका छौं । अहिलेसम्म फोहोरको गुनासो आएको छैन ।’