Hamro Bulletin

पहिलो संस्करणको नेपाल प्रिमियर लिग (एनपिएल)अन्तर्गत बुधबार प्लेअफ र इलिमिनेटर खेल हुँदै छन् । फाइनल प्रवेशका लागि हुने पहिलो प्लेअफमा सुदूरपश्चिम रोयल्स र जनकपुर बोल्ट्सले एकआपसमा प्रतिस्पर्धा गर्दै छन् । इलिमिनेटरमा चितवन राइनोजले कर्णाली याक्सविरुद्ध खेल्नेछ । प्लेअफको विजेता सीधै फाइनलमा पुग्नेछ । इलिमिनेटरको विजेताले प्लेअफको पराजितसँग फाइनल प्रवेशका लागि प्रतिस्पर्धा गर्नेछ । प्लेअफमा पराजित टोलीलाई अन्तिम दुई स्थान बनाउन दोस्रोपटक मौका प्राप्त हुनेछ । आठ फ्रेन्चाइज सहभागीमा सुदूरपश्चिम सर्वाधिक १२ अंकका साथ शीर्ष स्थानमा रह्यो । १० अंक जोडेको जनकपुर दोस्रो स्थानमा सीमित भयो । चितवन र कर्णालीले समान सात खेलबाट आठ अंक बनाए । रनरेटका आधारमा चितवन तेस्रो र कर्णाली चौथो भएका हुन् ।

सुदूरपश्चिमविरुद्ध जनकपुर 
सुदूरपश्चिमले समूह चरणमा उत्कृष्ट प्रदर्शन गरेको थियो । ब्याटिङ र बलिङमा एकनाशको प्रदर्शन हुँदा सुदूरपश्चिमले लगातार तीन खेल जितेको थियो । सुदूरपश्चिम चितवनसँग मात्र पराजित भएको थियो । दीपेन्द्रसिंह ऐरी मार्की र कप्तान रहेको सुदूरपश्चिमलाई प्लेअफसम्म पुर्‍याउन स्वदेशी मात्र नभएर विदेशी खेलाडीको प्रदर्शन पनि उत्तिकै सानदार रह्यो । इंग्ल्यान्डका सेफअली जैव र न्युजिल्यान्डका बलर स्कट कुगेलेइनले विपक्षी ब्याट्सम्यानमाथि दबाब राखेका छन् । सुदूरपश्चिमले जनकपुरविरुद्धको जित लय कायम राख्न योजना बनाएको छ । ‘हामी जितको निरन्तरताका साथ फाइनल पुग्छौँ,’ कर्णालीलाई हराएपछि कप्तान दीपेन्द्रसिंहले भनेका थिए, ‘अहिलेसम्म सबै राम्रो भइरहेको छ र प्लेअफमा गल्ती गर्न हुन्न ।’ सुरुका चार खेल जित्दै सनसनी मच्चाएको जनकपुरले त्यसपछि मिश्रित नतिजा निकाल्यो । अन्तिम तीनमध्ये दुई खेल जनकपुरले गुमायो । ब्याटिङ र बलिङ बलियो देखिएको जनकपुर अन्तिम तीन खेलमा कमजोर देखियो । सुदूरपश्चिमसँग एनपिएलकै कम योगफलमा जनकपुर समेटिँदा कमजोर ब्याटिङ प्रदर्शन भयो । जनकपुरले प्लेअफमा सुदूरपश्चिमविरुद्ध समूह चरणमा हारको बदला लिने उद्देश्यका साथ प्रतिस्पर्धा गर्ने योजना बनाएको छ । यसमा विदेशी र नेपाली खेलाडीले पुनः एकपटक उत्कृष्ट प्रदर्शनको अपेक्षा टोलीले राखेको छ । 

चितवनविरुद्ध कर्णाली
चितवनलाई पहिलो संस्करणमा अन्य नतिजाले पनि साथ दियो । प्लेअफसम्मको यात्रामा चितवनको प्रदर्शन उतारचढाव भइरह्यो । सुरुमा लगातार दुई खेल जितेको चितवनले खर्चिलो फ्रेन्चाइज टोलीलाई खबरदारी दिएको थियो । इलिमिनेटरमा चितवनले जितकै लागि प्रयास गर्नेछ । कर्णालीविरुद्धको खेलमा पराजित हुँदा प्रतियोगिताबाटै बाहिरिनेछ । यद्यपि, कर्णालीलाई पनि यही डर छ । चितवनले पाकिस्तानका विश्व च्याम्पियन बलर सोहेल तनविर अनुबन्ध गरी बलिङ पक्ष बलियो बनाएको छ । एक किसिमले यस टोलीको बलियो पक्ष नै बलिङ आक्रमण हो । नेपालका रिजन ढकालले १३ विकेट लिइसकेका छन् । उनी पनि सर्वाधिक विकेट लिने बलरको दौडमा छन् । इंग्ल्यान्डबाट टेस्ट र एकदिवसीय खेलेका रवि बोपारा र कप्तान कुशल मल्ल फर्ममा आउनु चितवनका लागि सुखद पक्ष हो । कर्णालीले प्लेअफ स्थान बनाउन समूह चरणकै अन्तिम खेलको नतिजा प्रतीक्षा गरेको थियो । सुदूरपश्चिमले १२.२ ओभरमा लक्ष्य पूरा गरेको भए चितवनविरुद्ध काठमाडौंले मौका पाउने थियो । तर, सुदूरपश्चिमले दिइएको ओभरमा जित निकाल्दा कर्णाली रनरेटमा शीर्ष चारमा पुगेको हो । कर्णालीले भारतीय पूर्वओपनर शिखर धवनलाई भित्र्याउँदै सनसनी मच्चाएको थियो । कप्तान सोमपाल कामी, ओपनर देव खनाल र अलराउन्डर गुल्सन झाले समूह चरणमा गतिलो प्रदर्शन गर्न सकेनन् ।