ताजा अपडेट
धनगढीमा १४ गतेदेखि राष्ट्रिय उसु प्रतियोगिता, ८८ पदकका लागि प्रतिस्पर्धा
धनगढी । कैलालीको धनगढीमा १४ गतेदेखि निता स्मृति राष्ट्रिय उसु प्रतियोगिता हुने भएको छ । सुदूरपश्चिम प्रदेश खेलकुद परिषद्को सहयोग तथा सुदूरपश्चिम प्रदेश उसु संघको आयोजनामा १४ पुसदेखि १६ गतेसम्म सान्सौं विधामा सिनियर र जुनियर उसु प्रतियोगिता हुने भएको हो ।
सुदूरपश्चिम प्रदेश उसु संघका कार्यवाहक अध्यक्ष राजिव गुप्ताका अनुसार प्रतियोगितामा सात प्रदेश र तीन विभागीय टोली गरी १० टिमको सहभागिता हुने छ । ‘सिनियरतर्फ पुरुषमा सात वटा तौल समूह र महिलामा ६ वटा तौल समूहमा खेल हुने छन्,’ उनले भने, ‘जुनियरतर्फ चार तौल समूहमा पुरुषतर्फ र चार तौल समूहमा महिलातार्फ प्रतिस्पर्धा हुने छ ।’
उनका अनुसार २२ स्वर्ण, २२ रजत र ४४ कास्य गरी ८८ पदकका लागि प्रतिस्पर्धा हुने छ । प्रतियोगितामा सिनियरतर्फ पहिलो हुने टिमलाई नगद ५० हजार, दोस्रोलाई ३० हजार र तेस्रोलाई २० हजारसहित पदक प्रदान गरिने छ । यस्तै, जुनियरतर्फ पहिलो हुने टिमलाई नगद २५ हजार, दोस्रोलाई १५ हजार र तेस्रोलाई १० हजारसहित पदक प्रदान गरिने छ ।
प्रतियोगितामा एक सय ९६ खेलाडीले भाग लिनेछन् । प्रतियोगिता आयोजनाका लागि ४८ लाख २५ हजार बढी खर्च हुने आयोजकले अनुमान गरेको छ ।
सुदूरपश्चिमकी उसु खेलाडी निता खड्काको सम्झनामा प्रतियोगिता आयोजना गर्न लागिएको हो । धनगढी उपमहानगरपालिका–१२ जुगेडाकी १८ वर्षीया निता खड्काको सवारी दुर्घटनामा मृत्यु भएको थियो ।
प्रतिक्रिया