ताजा अपडेट
टिकटकमा कल्पना गरेको २ दिनपछि दुर्घटना, जनस्वास्थ्य निरीक्षकको निधन
२३ सेकेन्डको टिकटक भिडिओ, जसमा राति मोटरसाइकलमा दुईजना यात्रा गरिरहेको दृश्य छ।
त्यही दृश्यमा एउटा आवाज गुञ्जिरहेको छ, ‘एक दिन मेरो ठूलो एक्सिडेन्ट होस्। म जीवन र मृत्युसँग लडिरहँदा मलाई हस्पिटल पुर्याउने जिम्मा तिमीलाई दिइयोस्। अनि तिमीसँग डाक्टरले भनोस् कि आइएम सरी, मैले हजुरको मान्छे बचाउन सकिनँ। तब तिमीलाई मेरो मायाको आभास हुनेछ र म सदाका लागि निदाउनेछु।’
दुई दिनअघि आफ्नो टिकटक अकाउन्टमा यस्तै भिडिओ राखेका थिए- बाजुराको बडिमालिका नगरपालिका-७ निवासी ३० वर्षीय धर्म खत्रीले। दुर्भाग्य! उनै खत्रीको बिहीबार मोटरसाइकल दुर्घटनामा मृत्यु भएको छ।
कैलालीको धनगढी उपमहानगरपालिका-३ मा मोटरसाइकल दुर्घटना हुँदा घाइते उनको उपचारका क्रममा मृत्यु भएको प्रहरीले जनाएको छ।
बिहीबार साँझ साढे ६ बजे धनगढी-३ को लक्ष्मी नर्सरीनजिक खत्री सवार मोटरसाइकललाई अत्तरियाबाट धनगढीतर्फ आउँदै गरेको सु.प.प्र.०१२ प ९४१६ नम्बरको मोटरसाइकलले पछाडिबाट ठक्कर दिएको थियो।
प्रहरीका अनुसार खत्री डोटीको शिखर नगरपालिका-११ की २५ वर्षीया शर्मिला थापाले चलाएको सु.प.प्र ०१–०१२ प ७११ नम्बरको मोटरसाइकलमा पछाडि बसेका थिए।
दुर्घटनामा चालक थापा र सवार खत्री दुवै घाइते भए। उपचारका लागि माया मेट्रो अस्पताल धनगढी लगियो। तर उपचारका क्रममा खत्रीको बिहीबार साँझ ७ बजेतिर मृत्यु भएको प्रहरीले जनाएको छ।
खत्री स्वास्थ्यकर्मी हुन। उनी बडिमालिका नगरपालिका-७ चुथीस्थित मार्तडी स्वास्थ्य चौकीमा जनस्वास्थ्य निरीक्षक थिए।
घाइते थापाको अवस्था मध्यम छ। उनको उपचार भइरहेको प्रहरीले जनाएको छ। ठक्कर दिने मोटरसाइकल चालक धनगढी उपमहानगरपालिका-५ का २५ वर्षीय पुरन शाहलाई प्रहरीले नियन्त्रणमा लिएको छ।
प्रतिक्रिया