Hamro Bulletin

धनगढी– सुदूरपश्चिम प्रदेशमा उत्पादित रैथाने बाली संरक्षण तथा पशुपन्छी र मत्स्यको विकासका साथै कृषकलाई एकै थलोमा ल्याउन कैलालीको धनगढीमा प्रथम प्रदेशस्तरिय कृषि तथा पशुपन्छी मेला प्रदर्शनी हुने भएको छ ।

प्रदेश सरकार गठन भएको सात वर्षपछि पहिलो पटक प्रदेश कृषि विकास निर्देशनालयको आयोजनामा माघ २६ गतेदेखि ‘सुदूरपश्चिम प्रदेशको सम्बृद्धिका लागि समग्र कृषि क्षेत्रको आधुनिकीकरण, व्यवसायिकरण, बिविधिकरण र औद्योगिकीकरण’ भन्ने मूल नाराका साथ मेला गर्न लागिएको हो ।

मेला सुदूरपश्चिम प्रदेश सरकारको सहयोगमा तथा सरोकारवाला सबै सरकारी, गैरसरकारी र नीजि क्षेत्रको समन्वय र सहकार्यमा प्रदेश स्थापना भएपछिको पहिलो पटक गर्न लागिएको निर्देशनालयले जनाएको छ ।

माघ ३० गतेसम्म चल्ने मेला धनगढी उपमहानगरपालिका वडा नम्बर १ पशुपति टोलस्थित खुल्ला चौरमा हुने निर्देशनालयका खगेन्द्र शर्माले जानकारी दिए ।

मेलामा कृषक, कृषि समूह÷सहकारी, कृषि फार्म, कृषि उद्यमी÷ब्यवसायी तथा कृषि वा पशुपन्छी बिषय अध्ययन गरि रहेका बिद्यार्थीहरू गरि एक सय २० स्टल रहने आयोजकले जनाएको छ ।

मेलामा प्रदेशको कृषि, पशुपन्छी र मत्स्य क्षेत्रको विकासमा प्राप्त भएको उपलब्धीहरूको एउटा झलक प्रत्यक्ष अवलोकन गर्न पाइने, नौ वटै जिल्लामा उत्पादित कृषि, पशुपन्छी र मत्स्यजन्य बाली/वस्तुहरू रैथाने/स्थानीय समेतको अवलोकन गर्न पाउनुका साथै खरिद/बिक्री गर्न सकिने, कृषि, पशुपन्छी र मत्स्य विकास क्षेत्रका समसामयिक बिषयहरूमा सम्बन्धित बिज्ञहरूबाट जानकारी लिन सकिने, बिभिन्न आधुनिक मेशिनरीहरूको अवलोकन गर्न पाउनुका साथै खरिद÷बिक्री गर्न सकिने निर्देशक शर्माले बताए ।

उनका अनुसार बिभिन्न गैरकाष्ठ बन पैदावारहरू तथा घरेलु एवं साना उद्योगहरू बाट उत्पादित सामाग्रीहरूको अवलोकन गर्न पाउनुका साथै खरिद÷बिक्री गर्न सकिने छ । 

उनले मेलामा प्रदेशका बिभिन्न समुदायमा प्रचलित प्रमुख पोषणयुक्त रैथाने/स्थानिय खाद्य परिकारहरूको अवलोकन गर्न पाउनुका साथै तिनको स्वादको मजा लिन पाइने बताए । उनले बिभिन्न समुदायमा प्रचलित महत्वपूर्ण  रैथाने/स्थानिय नृत्य एवं गितहरूको आनन्द लिन पाइने बताए ।

मेलामा निःशुल्क सहभागि हुन तथा अवलोकन गर्न पाउने ब्यवस्था मिलाइएको उनको भनाई छ ।