ताजा अपडेट
अछामका दुई किशोरी मृत फेला : हत्या भएको निष्कर्षमा प्रहरी
धनगढी । अछामको ढकारी गाउँपालिकाका–८ का १४ वर्षीया इशरा खड्का र उनकी फूपू १५ वर्षीया सरस्वती खड्काको हत्या भएको निष्कर्षमा प्रहरी पुगेको छ । घटनाको अनुसन्धानका लागि खटिएका चार वटा टोली सो निष्कर्षमा पुगेका हुन् । `नियन्त्रणमा लिइएका दुई जनाले पनि हत्यामा आफ्नो संलग्नता स्वीकार गरिसकेका छन्,´ अनुसन्धानमा संलग्न एक प्रहरी अधिकारीले भने ।
यता जिल्ला प्रहरी कार्यालयका प्रमुख तथा प्रहरी नायब उपरीक्षक इश्वरीप्रसाद भण्डारीले घटनाबारे शनिबार पत्रकार सम्मेलन नै गरेर सार्बजनिक गर्ने तयारी रहेको बताए । `अहिले पनि सीआइबीको टोलीली अनुसन्धान जारी राखेको छ,´ उनले भने, `भोलिसम्म घटनाको सम्पूर्ण विवरण सार्बजनिक गर्ने तयारीमा छौं ।´ उनका अनुसार दुई जनाविरुद्ध कर्तव्य ज्यानमा म्याद थप गरेर अनुसन्धान भइरहेको छ ।
अनुसन्धान खटिएका एक अधिकारीका अनुसार शनिबार इशरा र सरस्वतीसंगै अर्को गाउँका आरोपित दुई जना पनि गोठालो गएका थिए । `एक किशोर सरस्वती र अर्को इशरासंग बस्दै कुराकानी गरेका रहेछन्, सोही समयमा सुरुमा सरस्वती र एक किशोरबीच विवाद भएको रहेछ,´ ती अधिकारीले भने, `सरस्वतीलाई ढुङ्गाले प्रहार गर्दै कर्तव्य ज्यान गरि भीरबाट फालेको अनुसन्धानका क्रममा देखिएको छ । सरस्वतीलाई मृत देखेपछि इशराले परिवारमा भनिदिने बताएकी रहेछन् । सोही क्रममा उनलाई पनि छातीमा ढुङ्गाले प्रहार गरेर भीरबाट फालिएको खुलेको छ ।´ ती अधिकारीका अनुसार हत्या गर्न प्रयोग भएका केही ढुङ्गा भीरमा त केही तल मैदानमा भेटिका छन् । `इशराको एक किशोरसंग पहिलेदेखि नै कुरा हुने गरेको खुलेको छ,´ ती अधिकारीले थपे, `आरोपित दुई जनालाई त्यो जंगलमा गएको र फर्केको देख्ने पनि भेटिएका थिए । दुबै किशोर अन्डर एजका हुन् ।´
घटनाको अनुसन्धानका लागि अछाम प्रहरीको टोलीसंगै प्रदेश प्रहरी कार्यालयबाट प्रहरी निरीक्षक उपेन्द्र बम, संघीय प्रहरी महेन्द्रनगरबाट प्रहरी नायब निरीक्षक सुशील चन्द र पदम थापा र सीआइबीको टोली खटिएको थियो । सुदूरपश्चिमका डिआइजी गणेश चन्द पनि आफैं अछाम पुगेका थिए । सीआबीबाहेकको टोली अछामबाट फर्किसकेको छ । बाख्रा चराउन गएका दुई किशोरीको शनिबार बेलुका ढकारी गाउँपालिका-१ स्थित छिन्ने ओडारको भीरमा फेला परेको थियो ।
प्रतिक्रिया