Hamro Bulletin

धनगढी । बैतडीमा जिल्लास्तरीय भलिबल प्रतियोगिता हुने भएको छ । फागुन १५ गतेदेखि १८ गतेसम्म मेनेजर तेजबहादुर चन्द स्मृति भलिबल प्रतियोगिता हुन लागेको हो ।

मेनेजर तेजबहादुर चन्द स्मृति ट्रष्टका सचिव विनोदबहादुर चन्दका अनुसार प्रतियोगितामा जिल्लाका १० वटा पालिकाका टिमको सहभागिता रहने छ । 

प्रतियोगितामा प्रथम हुने टीमलाई नगद एक लाख २५ हजारसहित ट्रफी, दोस्रो हुने टिमलाई नगद ७५ हजारसहित ट्रफी तथा तेस्रो हुने टिमलाई नगद ३५ हजारसहित ट्रफी वितरण गरिने चन्दले जानकारी दिए । यस्तै सान्त्वना हुने टिमलाई पनि नगद १५ हजार पुरस्कार दिइने ट्रष्टका सचिव चन्दले बताए । भलिबल प्रतियोगिता दशरथ चन्द नगरपालिका–५ सुन्दरखालीमा हुने छ । 

यसअघि पनि तेजबहादुर चन्द स्मृति भलिबल प्रतियोगिताका दुई संस्करण भइसकेका छन् । योभन्दा पहिले एक संस्करण दशरथचन्द नगरपालिकास्तरीय भलिबल प्रतियोगिता भएको थियो भने एकपटक जिल्लास्तरी भलिबल प्रतियोगिता भएको थियो । 

तेजबहादुर चन्द बैकंका व्यवस्थापक थिए । उनको मृत्युपछि उनका छोराहरुले ट्रष्ट खोलेका थिए । उक्त ट्रष्ट जिल्लामा विभिन्न खेल गतिविधिसंगै सामाजिक कार्यमा पनि सक्रिय छ ।