Hamro Bulletin

कैलाली- कमलबहादुर शाह नेतृत्वको सुदूरपश्चिम प्रदेश सरकारको चालू आर्थिक वर्षको पुँजीगत (विकास) खर्च एकदमै कमजोर देखिएको छ । चालू आर्थिक वर्षको पाँच महिना सकिएको छ । आर्थिक वर्ष २०८१/०८२ सुरु भएको ६३ दिनपछि बजेट ल्याएको सुदूरपश्चिम सरकार बजेट खर्चमा झन् पछाडि रहेको छ । चालू आर्थिक वर्षको पाँच महिनाको अवधिमा पुँजीगत खर्च एक अर्ब ३२ करोड ३६ लाख अर्थात् सात प्रतिशत मात्रै छ । त्यसमध्ये एक अर्ब गतवर्ष गरिएको कामको भुक्तानी दिँदा भएको खर्च हो ।

सबैभन्दा बढी पुँजीगत बजेट रहेको भौतिक पूर्वाधार विकास मन्त्रालयका प्रवक्ता मोहन कुँवरका अनुसार एक अर्बभन्दा बढी गत वर्षदेखि कार्यान्वयनमा रहेको योजनाको भुक्तानी हो । उनले भने, ‘चालू आर्थिक वर्षको खर्च हुने कुरै छैन । बजेट पनि ढिला आयो । भर्खर प्रक्रिया सुरु हुँदैछ ।’

प्रदेश सरकारको कूल बजेट ३१ अर्ब ६२ करोड ९८ लाख २८ हजार रहेकोमा चालू आर्थिक वर्षमा पुँजीगत बजेट १८ अर्ब ७६ करोड २४ लाख २३ हजार रहेको छ । चालूतर्फको बजेट १२ अर्ब ८५ करोड ७४ लाख ५ हजार रहेकोमा मंसिरसम्म २ अर्ब १२ करोड २ लाख ४४ हजार खर्च भएको प्रदेश लेखा नियन्त्रक कार्यालयले जनाएको छ ।

सुदूरपश्चिम प्रदेश सरकारले अहिलेसम्म आठ वटा बजेट ल्याएको छ । बजेटको आकार सुरुवातदेखि लगभग उस्तै छ । प्रदेश सरकारले ल्याएका सात वटा बजेटको कार्यान्वयन अवधि सकिँदासम्म ६७ अर्ब बजेट खर्च गर्न सकेको छैन ।
आर्थिक वर्ष २०७४/०७५ मा तीन महिनाका लागि प्रदेश सरकारले एक अर्ब दुई करोड पाँच लाखको बजेट ल्याएको थियो । त्यो वर्ष ७६ करोड ६ लाख खर्च भएन ।

आर्थिक वर्ष २०७५/०७६ का लागि २५ अर्ब छ करोड ५६ लाखको बजेट ल्याएको प्रदेश सरकारले १० अर्ब ९० करोड २२ लाख खर्च गर्न सकेन । आर्थिक वर्ष २०७६/०७७ का लागि २८ अर्ब १६ करोड २० लाखको बजेट ल्याएकोमा १० अर्ब ४७ करोड खर्च भएको थिएन ।

आर्थिक वर्ष २०७७/०७८ का लागि ३३ अर्ब ३८ करोड १३ लाखको बजेट प्रस्तुत गरिएकोमा ११ अर्ब ४९ करोड ९५ लाख खर्च भएको थिएन । आर्थिक वर्ष २०७८/०७९ का लागि ३० अर्ब ३३ करोड ९४ लाखको बजेट प्रस्तुत गरिएको थियो । १० अर्ब ५० करोड ९४ लाख खर्च भएन ।

आर्थिक वर्ष २०७९/०८० का लागि ३६ अर्ब ७४ करोड ६४ लाखको बजेट ल्याइएकोमा १० अर्ब ९३ करोड पाँच लाख खर्च भएको थिएन । गत आर्थिक वर्ष २०८०/०८१ का लागि २९ अर्ब २६ करोड ५९ लाखको बजेट ल्याइएकोमा १० अर्ब ६६ करोड ८० लाख खर्च भएन ।