ताजा अपडेट
कञ्चनपुरमा हत्या अभियोगमा फरार कांग्रेसका नेता बोहरा पक्राउ
धनगढी । कञ्चनपुरमा हत्या अभियोगमा फरार रहेका नेपाली कांग्रेसका एक नेतालाई पक्राउ गरिएको छ । कर्तव्य ज्यान मुद्दामा फरार रहेका वेदकोट नगरपालिका–१ का ३४ वर्षीय उद्धव बोहरालाई काठमाडौंबाट पक्राउ गरिएको कञ्चनपुरका प्रमुख प्रहरी उपरीक्षक(एसपी) चक्रराज जोशीले जानकारी दिए ।
उनकाअनुुसार बोहरालाई काठमाडौँबाट पक्राउ गरेर कञ्चनपुर ल्याइएको छ । नेपाली कांग्रेस कञ्चनपुरका जिल्ला कार्य समिति सदस्य समेत रहेका बोहरामाथि वेदकोटकै हर्कबहादुर खडायतको हत्या गरेको अभियोग छ ।
एसपी जोशीले बोहरासहितको समूहले २८ कात्तिक २०८० मा वेदकोट नगरपालिका–१ हात्तीथलामा देउसी–भैलो हेरेर फर्किरहेका बेला खडायतलाई घेरा हालेर कुटपिट गरेको बताए । तत्कालीन समयमा पाँच जनाविरुद्ध कर्तव्य ज्यान उद्योग शिर्षकमा मुद्दा दर्ता भएकोमा चक्र बोहरा पक्राउ परेका थिए ।
तर खडायतको उपचारका क्रममा १० पुस २०८० मा मृत्यु भएपछि भने कर्तव्य ज्यान शिर्षकमा मुद्दा दर्ता गरिएको थियो । बोहरा पक्राउ परेपनि उक्त मुद्दामा अन्य चार जना अझै फरार छन् । उनीहरुको खोजी भइरहेको प्रहरीले जनाएको छ ।
यस्तै, प्रहरीले मंगलबार नै अन्य फरार प्रतिवादीलाई पनि पक्राउ गरेको छ । पक्राउ पर्नेमा कृष्णपुर नगरपालिका–६ बस्ने भानुु डगौरा र कृष्णपुर नगरपालिका–१ का ईश्वर रावल रहेको एसपी जोशीले बताए ।
उनीहरु मध्ये डगौरालाई ज्यान सम्बन्धी मुद्दामा १७ भदौ २०८१ मा जिल्ला अदालतले ६ महिना कैद र १५ हजार रुपैयाँ जपरिवाना सुनाएको थियो भने रावललाई मानव बेचबिखन मुद्दामा १० वर्ष कैद र एक लाख रुपैयाँ जरिवाना सुनाइएको प्रहरीले जनाएको छ ।
पक्राउ परेका फरार प्रतिवादीलाई जिल्ला अदालतमा बुुझाइनेछ । कञ्चनपुर प्रहरीले पछिल्लो एक महिनामा मात्र एक सय १८ जना फरार प्रतिवादीलाई पक्राउ गरिएको जनाएको छ ।
प्रतिक्रिया