Hamro Bulletin

धनगढी । स्वतन्त्र विद्यार्थी युनियन (स्ववियू) निर्वाचनअन्तर्गत सुदूरपश्चिमका ११ क्याम्पसमा निर्विरोध नेतृत्व चयन भएको छ । कतै विभिन्न संगठनबीच पद बाँडफाड भएर त कतै एकल उम्मेदवारी परेर निर्विरोध नेतृत्व चयन भएको हो । ११ मध्ये छ मा अनेरास्ववियू, तीनमा नेविसंघ र दुई मा अखिल (क्रान्तिकारी)का सभापति चयन भएका छन् । 

दार्चुलामा त्रिविअन्तर्गतका सबै पाँच वटा क्याम्पसमा निर्विरोध रुपमा स्ववियूको समिति चयन भएको छ । नेविसंघ, अखिल र अखिल क्रान्तिकारीबीच भागबन्डा गर्ने सहमतिअनुसार निर्विरोध रुपमा नेतृत्व चयन गरिएको हो । भागबन्डाअनुसार नेविसंघले दुई, अखिलले दुई र क्रान्तिकारीले एक क्याम्पस पाएको छ ।

अखिलका जिल्ला अध्यक्ष नरेन्द्र जोशीका अनुसार लटीनाथ क्याम्पस मार्मामा रुकेश बिष्ट र कृष्ण स्नातक क्याम्पस लालीमा ओमकार पाल अखिलबाट सभापितमा सर्वसम्मत चयन भएका छन् । 

यस्तै, नेविसंघको तर्फबाट अपिनम्पा क्याम्पस हुतीमा शेरबहादुर बम र राष्ट्रिय क्याम्पस दत्तुमा लिलु भट्ट सभापति चयन भएका छन् । शंकरपुर क्याम्पस दार्चुलामा अखिल (क्रान्तिकारी)का जानकी टमटा स्ववियू सभापतिमा निर्विरोध चयन भएकी छिन् ।

यस्तै, बझाङमा सेती क्याम्पसमा अखितका दीपेन्द्र दौल्याल, बैतडीको नवप्रभात संयुक्त क्याम्पसमा अखिलकै सपना चन्द, बैतडीकै शिक्षा क्याम्पसमा अखिलका अक्बर चन्द र बाजुराको बुदिनन्दा क्याम्पसमा अखिलका भाष्कर शाही निर्विरोध सभापति चयन भएका छन् । 

अछामको साँफेबगर नगरपालिका–२ मा रहेको त्रिपुरा बहुमुखी क्याम्पसको स्ववियू सभापतिमा नेपाल विद्यार्थी संघका कमल कुँवर निर्विरोध निर्वाचित भएका छन् । कुँवर दोस्रोपटक सभापतिमा निर्वाचित भएका हुन् । 

शान्ति आदर्श बहुमुखी क्याम्पस बझाङमा अनेरास्ववियू (क्रान्तिकारी)का बम धामी निर्वाचित भएका छन् । सुदूरपश्चिमका त्रिविअन्तर्गत रहेका ५३ कलेजमा निर्वाचन प्रक्रिया अगाडि बढाइएको थियो । प्रदेशभर त्रिवि मातहतका ७६ कलेज भए पनि ५३ वटामा मात्रै संगठन दर्ता भएको छ ।