Hamro Bulletin

धनगढी– सुदूरपश्चिम प्रदेश सभाको पाँचौ अधिवेशनको बैठकमा प्रतिपक्षी दलहरुको अवरोध जारी रहेको छ ।

पाँचौ अधिवेशनको १९ औं बैठकमा नीति तथा योजना आयोगमा सदस्य थप गर्दै प्रदेश सरकारले फजुल खर्चमा बृद्धि गरेको भन्दै बैठक अवरोध गरेका थिए । बुधबार दिउँसो २ बजे आह्वान गरेको बैठकमा पुनः प्रतिपक्षी दलहरुले अवरोध जारी राखेका हुन ।

बुबार प्रतिपक्षी दलहरुले बैठक अवरोध गरेपछि सभामुख भिमबहादुर भण्डारीले बैठक आधा घण्टाका लागि स्थगित भएको जानकारी दिए । नेकपा माओवादी केन्द्र, नेकपा एकीकृत समाजवादी पार्टी, राष्ट्रिय प्रजातन्त्र पार्टीले बुधबार पनि आफनो स्थानमा उभिएर सरकारको विरोध गरे ।

एकीकृत समाजवादी पार्टीका नेता तथा प्रदेश सभा सदस्य नरेशबहादुर शाहीले सरकारले योेजना तथा नीति आयोगमा पाँच सदस्य राखेर सरकारको खर्चमा बढोत्तरी ल्याएको बताएका थिए । 

उनले सरकारले नीति तथा योजना आयोगमा सदस्य थप गरेको विषयलाई फिर्ता नगरेसम्म बैठक चल्न नदिने बताएका थिए ।

उनले भनेका थिए –‘नीति तथा योजना आयोगमा तीन जना सदस्यको सट्टा पाँच जना सदस्य सृजना गरेर जुन सुविधा दिने गरेर अथवा त्यसलाई संशेधन गरियो त्यसप्रति हाम्रो असहमति छ । यो प्रदेश सरकारका तर्फबाट अविलम्ब सच्याइनुपर्छ । माननीय सभामुखज्यूमार्फत यो प्रदेश सरकारलाई रुलिङ्ग होस । कि हाम्रो मागको सम्बोधन होस ।’

बुधबार पनि सभामुख भण्डारीले आसन ग्रहण गर्नका लागि अनुरोध गरे । तर, प्रतिपक्षी दलहरु आ–आफनो कुर्चिमा उभिइरहेपछि सभामुख भण्डारीले भने –‘प्रतिपक्षी दलहरु आ–आफनो स्थानमा उभिएर बैठक अवरोध गर्नुभएकोले आजको कारबाही आधा घण्टासम्मका लागि स्थगित गरिएको छ ।’

बुधबार बस्ने भनेको पाँचौ अधिवेशनको २० औं बैठकमा ‘केही उद्योग तथा वन सम्बन्धी ऐनलाई संशोधन गर्न बनेको विधेयक’ माथि सामान्य छलफलका लागि प्रस्ताव पेश गर्ने कार्यसूचि रहेको थियो ।