ताजा अपडेट
सुदूरपश्चिम खेलकुद परिषद सदस्य सचिव सिंह नियूक्त भएको चार वर्ष पुरा हुँदै
धनगढी- अहिले सुदूरपश्चिम प्रदेशमा खेलकुदमा चर्चाको विषय बनेको छ खेलकुद परिषदमा नयाँ सदस्य सचिवको नियूक्ती । सदस्य सचिवमा नियूक्त भएका दिपकबहादुर सिंहको पदावधि सकिनै लाग्दा सत्तागठबन्धन दलले अब नयाँ सदस्यसचिव कसलाई नियूक्त गर्छ भन्ने खेल क्षेत्रमा कार्यरत संघ–संस्था, प्रशिक्षक, खेलाडी, खेलकुदप्रमी लगायतमा कौतुहल बढेको छ ।
संघिय खेलकुद ऐनमा कार्यकारी पदका लागि खुल्ला प्रतिस्पर्धाबाट जानुपर्ने प्रावधान रहेपनि प्रदेश खेलकुद ऐनले सदस्य सचिवको राजनीतिक नियूक्ति गर्ने व्यवस्था गरेको छ । सुदूरपश्चिम प्रदेश खेलकुद ऐनले खेलकुद परिषद गठन गर्ने व्यवस्था गरेको छ । २०७६ सालमा जारी भएको सो ऐनले परिषदमा सदस्य सचिव राजनीतिक नियूक्ति गर्ने व्यवस्था गरेको छ । अहिले परिषदको सदस्य सचिव दिपक सिंह रहेका छन् । उनी सदस्य सचिवमा नियूक्त भएको आज ९फागुन २८ गते० चार वर्ष पुरा हुन्छ । तर, मन्त्रालयले मन्त्रीपरिषदले नियूक्त गरेको मिति भन्दा नियूक्तिपत्र दिएको मितिलाई अन्तिम मान्ने बताएको छ ।
उनको पदावधि सकिनै लाग्दा सो पदका लागि सत्तागठबन्धन दलमा रहेका खेलकुद आयोजक, प्रशिक्षक, खेलाडीहरु दौडमा छन् । तर, सरकारले नयाँ सदस्य सचिव नियूक्तिबारे सुरसार गरेको छैन ।
सदस्य सचिव सिंहको कार्यअवधि सकिनै लाग्दा आँकाक्षीहरु सरकारले यथाशिघ्र परिषदको सदस्य सचिव नयाँ गठनमा ध्यान दिनुपर्ने बताइरहेका छन । सिंह २०७७ फागुन २८ गतेको मन्त्रीपरिषद बैठकबाट सदस्य सचिवमा नियूक्त भएपनि उनलाई नियूक्ति पत्र २०७७ चैत ८ गते दिइएको सामाजिक विकास मन्त्रालयले जनाएको छ । मन्त्रालयका कानुन अधिकृत दानबहादुर सुनारले भने –‘खेलकुद परिषदका सदस्य सचिवको कार्यअवधि यहि चैत ७ गते सकिन्छ । सोभित्र प्रदेश सरकारले नयाँ नियूक्ति गरिसक्नुपर्छ ।’ तर, प्रदेशको सामाजिक विकास मन्त्रालयले भने सो विषयमा ध्यान नदिएको जनाएको छ ।
खेलकुद ऐन २०७६ अनुसार परिषद गठनका प्रक्रिया उल्लेख छन । ऐनको दफा ३ अनुसार परिषद गठनका लागि सामाजिक विकास मन्त्री वा राज्यमन्त्री वा सहायक मन्त्री अध्यक्ष रहने छन । अध्यक्षको सिफारिसमा प्रदेश सरकारले नियूक्त गरेको व्यक्ति सदस्य सचिव रहने छ भने प्रदेश स्तरमा रहेका खेलकुदसम्बन्धी दर्ता भएका संघ, संस्थाहरुबाट मन्त्रालयले मनोनित गरेका कम्तीमा एक जना महिलासहित तीन जना सदस्य रहने छन ।
नयाँ सदस्य सचिव बन्नका लागि मुख्य गरी ५ योग्यता तोकिएको छ । ३० वर्ष पूरा भएको र ५५ वर्ष ननाघेको, नेपाली नागरिक, खेलकुद क्षेत्रमा १० वर्षको अनुभव हासिल गरेको हुनुपर्नेछ । साथै प्रचलित कानुनले अयोग्य घोषित नगरेको र स्वच्छ छवि भएको हुनुपर्ने प्रावधान छ ।
सत्ता गठबन्धनमा सदस्य सचिव कुन पार्टीले पाउने भन्नेसमेत अन्यौलता रहेको समयमा सामाजिक विकास मन्त्रालयको नेतृत्व नेपाली काँग्रेसको मन्त्री भएकाले काँग्रेस निकट खेलकुद क्षेत्रका संघ–संस्थाहरुका पदाधिकारीहरुको दौडधुप रहेको छ ।
प्रदेशस्तरिय खेलकुद सञ्चालन गर्न स्थापना भएको परिषदमा सदस्य सचिवका लागि कैलाली, कञ्चनपुर र डोटीबाट आकाक्षी देखिएका छन् । नेपाली काँग्रेसबाट खेल क्षेत्रमा सक्रिय व्यक्तिहरु सदस्य सचिवमा बढी आँकाक्षी देखिन्छन । सदस्य सचिवका लागि तरुण दलका केन्द्रीय सदस्य कैलालीका लोकबहादुर खड्का ९रवि खड्का०, त्रिलोक पाण्डेय, राजिव गुप्ता, कञ्चनपुरका ज्ञानेन्द्र सिंह र डोटीका प्रकाश शाही रहेका छन । तरुण दलका केन्द्रीय सदस्य समेत रहेका लोकबहादुर खड्का ९रवि० फुटबलका पूर्व राष्ट्रिय खेलाडी हुन् । हक्कीको पूर्व राष्ट्रिय खेलाडी, कुस्ती संघका पूर्व केन्द्रीय कोषाध्यक्ष, हाल क्रिकेट संघ संग आवद्ध रहेका रवि खड्का सुदूरपश्चिम क्षेत्रीय खेलकुद विकास समितिका पूर्व सदस्य समेत हुन् । यस्तै, डोटीका प्रकाश शाही डोटी जिल्ला खेलकुद समितिका अध्यक्ष हुन् । कैलालीका राजिव गुप्ता कैलाली जिल्ला खेलकुद खेलकुद समितिका पूर्व अध्यक्ष हुन् भने त्रिलोक पाण्डेय करातेका खेलाडी हुन । कञ्चनपुरका ज्ञानेन्द्र शाही नेपाल तेक्वाण्डो संघ कञ्चनपुरका अध्यक्ष हुन् ।
नेपाली काँग्रेसका नेताहरुले सदस्य सचिव नियूक्तिमा हतार नदेखाएको जनाएको छ । ‘सिंहको कार्यअवधि अझै बाँकी रहेको छ । त्यसैले अहिले पार्टीले नयाँ सदस्य सचिव नियूक्त गर्ने बारे कुनै छलफल गरेको छैन’ नेपाली काँग्रेस कैलाली सचिव नृपबहादुर सुनारले भने ।
प्रतिक्रिया