Hamro Bulletin

नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले एजेन्डा र विचार नमिलेकाले बुधबारको विपक्षी दलको बैठकमा राष्ट्रिय प्रजातन्त्र पार्टीलाई नबोलाएको बताएका छन्।

नयाँ बानेश्वरस्थित संसद् भवन परिसरमा सञ्चारकर्मीसँग कुराकानी गर्दै प्रमुख प्रतिपक्षी दलका नेतासमेत रहेका अध्यक्ष प्रचण्डले कुलमान हटाएको विरोधमा भने मत मिलेको बताएका छन्।

‘उहाँहरूको एजेन्डा र विचार नमिलेको भएर आज बोलाइएन। अहिले कुलमान घिसिङ हटाएको विरोधमा कुरा मिलेकै छ। हामी सँगै छौं,’ उनले भने।

आज बसेको संविधान र गणतन्त्र पक्षधर विपक्षी दलको बैठकले नेपाल विद्युत प्राधिकरणको कार्यकारी निर्देशकबाट कुलमान घिसिङलाई हटाएको विषयमा सदनमा सशक्त प्रतिवाद गर्ने निर्णय गरेको थियो। आजको बैठमा माओवादी केन्द्र, राष्ट्रिय स्वतन्त्र पार्टी, एकीकृत समाजवादी, नेपाल समाजवादी पार्टी सहभागी थिए।

बैठकको निर्णयानुरूप नै उनीहरू सदनमा प्रस्तुत भएका थिए। 

प्रमुख प्रतिपक्षी दल नेकपा (माओवादी केन्द्र) सहित विपक्षी दलले घिसिङ हटाएकोबारे प्रधानमन्त्री केपी शर्मा ओलीले जबाफ नदिएसम्म सदन चल्न नदिने भन्दै अवरोध गरेका थिए। विपक्षी दलहरूको अवरोधका कारण प्रतिनिधि सभा बैठक बिहीबारसम्म स्थगित भएको छ।घिसिङलाई बर्खास्त गरेकोमा राष्ट्रिय प्रजातन्त्र पार्टीले पनि प्रतिनिधि सभामा विरोध जनाएको थियो।