ताजा अपडेट
राहत र उद्धारका लागि सामाजिक विकासमन्त्री खड्का अछाम आउने : जयगढ बजार आगलागी
अछामको बान्नीगढी जयगढ गाउँपालिकाको केन्द्र जयगढ बजारमा मंगलबार साँझ भएको भीषण आगलागीपछि सुदूरपश्चिम प्रदेश सरकारले राहत तथा उद्दार कार्यमा सक्रिय भूमिका निर्वाह गरेको छ ।
आगलागीबाट भएको प्रारम्भिक क्षतिको मूल्याङ्कनका आधारमा प्रदेश विपद् व्यवस्थापन कोषबाट तत्कालका लागि ५० लाख रुपैयाँ राहत स्वरूप बान्नीगढी जयगढ गाउँपालिकालाई उपलब्ध गराउने निर्णय गरिएको हो ।
यस निर्णयसँगै आगलागीबाट प्रभावित परिवारहरुलाई राहत पुर्याउने, क्षतिको विस्तृत मूल्याङ्कन गर्ने र दीर्घकालीन पुनःस्थापनाका लागि आवश्यक योजना निर्माण गर्न प्रदेश सरकारले तयारी थालेको छ।
सामाजिक विकासमन्त्री मेघराज खड्का स्वयं आज अछामतर्फ प्रस्थान गरिसकेका छन् । मन्त्री खड्का घटनास्थलमै पुगेर स्थानीय जनप्रतिनिधि, प्रशासन तथा सुरक्षाकर्मीहरूसँग समन्वय गर्दै राहत तथा उद्दार कार्यलाई प्रभावकारी बनाउने उद्देश्यले अछाम आउन लागेका हुन्।
“यो दुःखद घडीमा सबै राजनीतिक दल, समाजसेवी, युवा, स्वयंसेवक र सँगसँगै आम जनतालाई विपद् व्यवस्थापनमा हातेमालो गर्न हार्दिक अनुरोध गर्दछु,” मन्त्री खड्काको सचिवालयले उल्लेख गरेको छ ।
आगलागीबाट दर्जनौँ घर र पसलमा क्षति पुगेको प्रारम्भिक विवरण आएको छ। विस्तृत विवरण संकलन कार्य जारी छ भने पीडितको तत्काल आवश्यकता सम्बोधन गर्न स्थानीय सरकार र प्रदेश सरकारबीच समन्वय तीव्र पारिएको छ ।
प्रतिक्रिया