ताजा अपडेट
प्रदेश सरकारको बजेट : फेरि दुई सयभन्दा बढी मन्दिरका योजनामा खन्याइयो बजेट
सुदूरपश्चिम प्रदेश सरकारले आगामी आर्थिक वर्षमा सानाठूला गरी साढे दुई सयभन्दा बढी मठमन्दिर मन्दिर निर्माण गर्ने भएको छ । विगतमा जस्तै आगामी वर्ष पनि मठमन्दिर निर्माणका नाममा सरकारले ठूलो बजेट खर्च गर्न लागेको हो ।
आगामी आर्थिक वर्ष २०८२/०८३ को बजेटसँग सम्बन्धित कार्यक्रम पुस्तिकामा पर्यटन क्षेत्रको विकासका लागि विनियोजन गरेको बजेटबाट ती मन्दिरहरु निर्माणका लागि बजेट विनयोजन गरिएको छ ।
प्रदेश सरकारको पर्यटन गुरुयोजनाले पर्यटनस्तरका ठूला मन्दिरमा लगानी गर्ने उल्लेख भए पनि त्यसको व्यवास्ता गर्दै पर्यटन क्षेत्रको बजेट स–साना मन्दिरका योजनामा राखिएको छ ।
कुलदेवतादेखि स्कूलको मन्दिर, चर्च, गुम्बा निर्माण गर्न प्रदेश सरकारले आगामी आर्थिक वर्ष प्रतियोजना १० देखि २० लाख रुपैयाँ विनियोजन गरेको छ । यसले गर्दा प्रदेशमा टुक्रे योजनाको चाङ लागेको भने मुख्यमन्त्री कमलबहादुर शाहले बजेट निर्माणका क्रममा तय गरेको चार बुँदे आधारलाई समेत उल्लङ्घन गरेको छ ।
मुख्यमन्त्री शाहले प्रदेशका मन्त्रालय र मातहतका कार्यालयले २५ लाख रुपैयाँभन्दा बढी लागतका योजना बनाउने र सोभन्दा कम लागतका योजना राख्नु परे त्यस्ता योजना स्थानीय तहलाई हस्तान्तरण हुने गरी बजेट राख्नेसहित चार बुँदे आधार तयार गरेका थिए ।
मन्दिरका योजनाहरु उद्योग, पर्यटन, वन तथा वातावरण मन्त्रालय मातहतको प्रदेश पर्यटन विकास कार्यक्रम कार्यान्वयन इकाईले कार्यान्वयन गर्ने गरी विनियोजन गरिएको छ ।
यसअघि, पनि पर्यटन विकासका लागि विनियोजन गरेको ठूलो बजेट मठमन्दिर निर्माणमा खर्च हुँदै आएको थियो । मन्दिरका योजनामा करोडौँ रकम खर्च हुने गरेको भन्दै विरोध भएपछि गत वर्ष मन्दिर निर्माणका योजना कम राखिएको थियो । यस वर्ष भने मन्दिर निर्माणका योजनाले पनि बजेटमा प्राथमिकता पाएको छ ।
प्रतिक्रिया