ताजा अपडेट
साँफेबगर नगरपालिकाको ७१ करोडको बजेट : शिक्षा, स्वास्थ्य र पूर्वाधारमा जोड
साँफेबगर नगरपालिकाले आर्थिक वर्ष २०८२/८३ का लागि कुल रु. ७१ करोड १२ लाख ६६ हजार २ सय १ को बजेट सार्वजनिक गरेको छ। साँफेबगर नगरपालिकाका नगर प्रमुख राजेन्द्र बहादुर कुँवरको अध्यक्षतामा सम्पन्न भएको नगर सभामा निति तथा कार्यक्रम र बार्षिक बजेट साँफेबगर नगरपालिकाका उपप्रमुख शिव बहादुर कुँवर (शिलोज)ले प्रस्तुत गर्नु भएको उक्त बजेटमा जनमुखी सेवा, समावेशी विकास र भौतिक पूर्वाधार विस्तारलाई मुख्य प्राथमिकतामा राखिएको छ।
नगरपालिकाले संघीय सरकारको सशर्त, समानीकरण, विशेष र पूँजीगत अनुदानमार्फत करिब ४७ करोड २२ लाख रुपैयाँ, प्रदेश सरकारबाट १० करोड ८२ लाख, र आन्तरिक आम्दानीबाट १ करोड १ लाख रुपैयाँ प्राप्त हुने अनुमान गरेको छ। बाँकी रकम अन्य स्रोतहरूमार्फत व्यवस्थापन गरिने जनाइएको छ।
बजेटले विशेष रूपमा शिक्षा, स्वास्थ्य र सामाजिक सुरक्षामा जोड दिएको छ। शिक्षा क्षेत्रमा ३ करोड ६० लाख रुपैयाँ विनियोजन गरिएको छ भने, विद्यालय कर्मचारीका सेवा सुविधाका लागि थप १ करोड २५ लाख छुट्याइएको छ। स्वास्थ्य सेवा सुदृढीकरणका लागि ४ करोड रुपैयाँको बजेट तय गरिएको छ।
यस्तै, महिला सशक्तीकरण कार्यक्रमका लागि ३० लाख, सामाजिक सुरक्षा क्षेत्रका लागि ५ लाख, र खेलकुदको प्रवर्द्धनका लागि ४० लाख रुपैयाँ विनियोजन गरिएको छ। विपन्न नागरिकलाई लक्षित राहत कार्यक्रममार्फत २० लाख रुपैयाँको व्यवस्था गरिएको छ।
पूर्वाधार विकास बजेटको अर्को महत्वपूर्ण अङ्ग बनेको छ। सडक, पुल तथा यातायातका संरचना विस्तारमा मात्रै १५ करोड रुपैयाँ विनियोजन गरिएको छ। चार वटा वडा भवन निर्माणका लागि १ करोड ५० लाख, नगरपालिका भवन तथा सूचना प्रविधि सुधार, खानेपानी, सिंचाइ, लघु जलविद्युत जस्ता पूर्वाधारका लागि पनि उल्लेख्य बजेट छुट्याइएको छ।
कृषि, पशुपालन, पर्यटन तथा साना उद्योगको प्रवर्द्धनमा समेत बजेट छुट्याइएको छ। कृषि विकास कार्यक्रमका लागि २० लाख, पशुपालनमा १२ लाख, पर्यटन तथा साहित्य प्रवर्द्धनमा १० लाख, र साना तथा घरेलु उद्योग विस्तारमा १० लाख विनियोजन गरिएको छ। सहकारी कार्यक्रममार्फत समुदायमा समुन्नति ल्याउने उद्देश्यले थप ५ लाख छुट्याइएको छ।
नगरपालिकाले चालु खर्चतर्फ करिब १९ करोड ५० लाख र पुँजीगत खर्चतर्फ करिब २१ करोड ३० लाख विनियोजन गरेको छ। नगरप्रमुखका अनुसार बजेट निर्माणमा सहभागीता, पारदर्शिता र जवाफदेहितालाई विशेष ध्यान दिइएको छ।
साँफेबगर नगरपालिकाको यो बजेटले सामाजिक सेवा प्रवाह, पूर्वाधार निर्माण, शिक्षा-स्वास्थ्यको गुणस्तर सुधार र विपन्न समुदायको उत्थानलाई प्राथमिकता दिएको छ। यो बजेटले स्थानीय तहमा विकासको गति तीव्र पार्ने अपेक्षा गरिएको साँफेबगर नगरपालिकाका नगर प्रमुख राजेन्द्र बहादुर कुँवर बताउनुहुन्छ ।नगर प्रमुख कुँवरका अनुसार बजेट पारदर्शी, सहभागी र जनउत्तरदायी रूपमा कार्यान्वयन गरिनेछ, जसले नगरवासीको जीवनस्तरमा ठोस सुधार ल्याउनेछ।
साँफेवगर नगरपालिकाका नगर प्रमुख राजेन्द्र बहादुर कुँवरको अध्यक्षतामा भएको कार्यक्रममा प्रमुख प्रशासकिय अधिकृत लक्ष्मी प्रसाद शर्मा, नगर कार्यपालीकाका सदस्य , १४ वटै वडाका वडा अध्यक्ष ,वडा सदस्य लगाएतको सहभागीता रहेएको थियो ।
प्रतिक्रिया